Smit hjá þjálfara í riðli Íslands

Frá þessu greina rúmenskir miðlar en Radoi greindist með kórónuveirusmit. Honum líður þó vel að eigin sögn: „Ég finn ekki fyrir neinum einkennum og ég vildi óska að þetta væri falskt próf,“ sagði Radoi.

Rúmenía mætir Norður-Makedóníu næsta fimmtudag, sama dag og Ísland og Þýskaland mætast í Þýskalandi. Rúmenía og Þýskaland mætast svo í Búkarest 28. maí og ef til vill verður Radoi klár í slaginn þá.

Fyrir fram má telja líklegt að Rúmenía og Ísland berjist um 2. sæti í riðlinum, en að Þýskaland vinni riðilinn og komist beint á HM í Katar. Liðið sem endar í 2. sæti kemst í umspil.

Einn af fyrstu leikjum Rúmeníu undir stjórn Radoi var gegn Íslandi á Laugardalsvelli í október síðastliðnum, í EM-umspilinu. Ísland vann þá 2-1 sigur og komst í úrslitaleik gegn Ungverjalandi en tapaði honum.

Ísland mætir Rúmeníu tvívegis á þessu ári, á Laugardalsvelli 2. september og svo á útivelli 11. nóvember í næstsíðustu umferð undankeppninnar.