Bjarni vill stýra Glitni áfram

Bjarni Ármannsson, forstjóri Glitnis, segist vilja halda áfram að stýra bankanum þrátt fyrir breytt eignarhald á félaginu. Karl Wernerson, sem var meðal þeirra sem seldi sinn hlut, býst við breytingum í stjórn bankans. Viðskiptin með hluti í bankunum eru fjölþætt og tilkynnt var til OMX Nordic Exchange kauphallarinnar í dag um sölu á 16,2% hlut.

Nóatúnsfjölskyldan er meðal nýrra hluthafa í Glitni eftir þessar breytingar á eignarhaldi félagsins. Einnig Jötunn, félag tengt Baugi. Endanlega hefur verið gengið frá sölu á hlutum í Glitni fyrir hátt í sjötíu milljarða króna.

Milestone, undir forystu Karl Wernerssonar og Einar Sveinsson, formaður bankastjórnar Glitnis og aðilar honum tengdir, hafa selt yfir sextán prósent hluta Glitni. Þessir aðilar hafa verið stærstu hluthafarnir í Glitni fyrir utan FL Group.

Þáttur sem er félag tengt Milestone mun áfram eiga 7% í Glitni og skuldbindur sig til að selja ekki hlut sinn til ótengdra aðila í 12 mánuði. Alls hefur verið gengið frá sölu 2,4 milljarða hluta og nemur salan hátt í sjötíu milljörðum króna.

Saxbygg kaupir um 5% af þessu hlutafé en áður átti félagið tæp 2% í Glitni. Þeir sem standa að Saxbygg eru meðal annar Nóatúnsfjölskyldan og Byggingarfélag Gylfa og Gunnars.

Jötunn kaupir um 2,5% en að því félagi standa meðal annars Baugur, Tom Hunter og Pálmi Haraldsson.

Þá er er enn óljóst með hver kaupir um átta prósenta hlut sem eftir stendur en Kaupþing sölutryggir þann hlut. Búast má við að Kaupþing hafi nú þegar kaupanda að hlutunum en verði þeir ekki seldir fyrir 16. apríl kaupir Kaupþing þá.

Ljóst er að töluverðar breytingar verða með þessu á eigendahópi fyrirtækisins.

Ströng ákvæði gilda um hverjir megi fara með virkan eignarhlut í fjármálafyrirtækjum. Fjármálaeftirlitið er nú að fara yfir söluna.