Eiga að víkja þegar mál eru í skoðun

„Það er afar óeðlilegt að fólk sem sakað er um kynferðisbrot, og rökstuddur grunur er fyrir því, sé ekki sett í frí á meðan er verið að rannsaka málið," segir Agnes M. Sigurðardóttir, biskup Íslands.

Fagráð þjóðkirkjunnar um meðferð kynferðisbrota hefur tekið á móti ásökunum um kynferðisbrot á hendur alls átján starfsmönnum kirkjunnar. Í þremur þessara átján tilvika hefur fagráðinu borist fleiri en ein ásökun á hendur sama aðila. Fagráðið var stofnað árið 1998.

„Þetta er greinilega átján of mikið," segir Agnes. „Hins vegar vitum við að kirkjan stofnaði fagráðið vegna þess að það var talin þörf á því að koma málum sem þessum í skikkanlegan farveg. Og það hefur greinilega sýnt sig að þörfin var fyrir hendi."

Fjögur mál af þessum átján voru tilkynnt innan fimm ára frá því að brot átti sér stað, sjö innan tíu ára og tilkynnt var um fjóra einstaklinga ellefu til tuttugu árum eftir að þeir brutu á viðkomandi einstaklingum. Þrjú mál af þessum átján eru enn eldri.

Fjórir starfsmenn þjóðkirkjunnar voru sakaðir um kynferðisbrot á síðasta ári, eins og fram kemur í ársskýrslu fagráðsins. Ekki fæst uppgefið hversu margir einstaklingar leituðu til fagráðsins í fyrra, en samkvæmt heimildum Fréttablaðsins snýr eitt málið að Ólafi Skúlasyni, fyrrverandi biskupi.

Tíu starfsmenn kirkjunnar voru ásakaðir um kynferðisbrot árið 2010. Tveimur var vikið úr starfi, en hvorugur starfaði sem prestur. Sum málanna áttu sér stað þegar þolendur voru börn að aldri og eru fyrnd að lögum.

Agnes segist munu beita sér sérstaklega til að koma í veg fyrir að kynferðisbrot eigi sér stað innan kirkjunnar.

„Auðvitað vil ég stuðla að því að svona mál finnist ekki í okkar kirkju frekar en í þjóðfélaginu öllu," segir hún. „Ég mun beita mér fyrir því. Þetta er eitthvað sem við höfum reynt að taka alvarlega og það má aldrei sofna á verðinum því þetta eru ekki mál sem klárast bara." sunna@frettabladid.is