Fjögurra mánaða skilorð fyrir heimilisofbeldi: Konan hélt að árásin yrði sitt síðasta

Héraðsdómur Reykjaness dæmdi í dag karlmann á sextugsaldri í fjögurra mánaða skilorðsbundið fangelsi vegna líkamsárásar á þáverandi unnustu sína í júní í fyrra, en árásin átti sér stað á heimili konunnar.

Taldi fjölskipaður dómur sannað að maðurinn hefði gerst sekur um þá háttsemi sem honum var gefið að sök í ákæru fyrir utan eitt atriði. Maðurinn var meðal annars ákærður fyrir að hafa sest klofvega yfir unnusta sína, haldi höndum hennar föstum fyrir ofan og slegið hana í hendurnar.

Síðar settist hann aftur klofvega yfir hana, sló hana með koddum auk þess sem hann þrýsti kodda harkalega í andlit hennar og ýtti höfði hennar til og frá. Konan hlaut ýmsa áverka, til að mynda nefbrot og marbletti víðs vegar um líkamann.

Maðurinn neitaði alfarið sök en að mati dómsins var trúverðugur framburður konunnar studdur framburði vitna sem komu fyrir dóminn. Fjögur þeirra höfðu til að mynda hitt konuna daginn eftir árásina og lýstu þau öll því að hún hafi verið í mikilli geðshræringu. Þá lýsti eitt vitnið því að nef konunnar hafi verið „innkýlt“ og hún þrútin í andliti.

Fyrir dómi lýsti konan árás mannsins en þegar maðurinn hélt kodda yfir andliti hennar og sló höfði hennar til og frá hélt hún að „þetta yrði hennar síðasta,“ eins og það er orðað í dómnum. Þá lýsti konan jafnframt því að hún hafi verið á hnjánum við rúmið þegar maðurinn hafi komið, snúið upp á hönd hennar og sett aftur fyrir bak á henni. Hann hafi svo ýtt höfði hennar niður í rúmdýnuna. Konunni fannst hún þá vera að kafna og fór því að öskra og æpa.

 

Var það metið manninum til bóta að honum hefur ekki verið gerð refsing áður en eins og áður segir var maðurinn dæmdur í fjögurra mánaða fangelsi sem skilorðsbundið er til tveggja ára. Þá var honum gert að greiða konunni hálfa milljón króna í miskabætur auk þess sem hann á að greiða allan sakarkostnað.

Dóm héraðsdóms má lesa í heild sinni hér.