Fjölda­upp­sagnir hjá Icelandair eftir helgi

Koma mun til fjöldauppsagna hjá Icelandair strax eftir helgi. „Við verðum því miður að grípa til mjög erfiðra og mikilla aðgerða til að minnka útflæði fjármagns.“ Þetta segir Bogi Nils Bogason, forstjóri Icelandair, en hann fjallaði um stöðu félagsins í Sprengisandi á Byljunni í morgun.

„Næstu mánuðir verða mjög erfiðir og við getum ekki búið til neinar áætlanir fyrir næstu sex til tólf mánuði en lykilatriðið er að minnka útflæðið og vera tilbúnir að fara af stað, því þetta mun fara af stað aftur og tækifærin verða mikil fyrir Ísland, að mínu mati.“

Icelandair hefur verið með þá stefnu að eiga þriggja mánaða lausafé fyrir kostnað næstu þriggja mánaða án tekna á reiðum höndum. Félagið kom inn í þessa stöðu aðeins sterkara en það, hafa skorið niður, bæði minnkað útflæði og endurskoðað efnahagsreikninga.

Nú um mánaðamótin verða liðnir þrír mánuðir frá því að Icelandair byrjaði að finna fyrir miklu tekjutapi vegna skerts flugs. Nú eru sex brottfarir á vegum Icelandair frá Keflavíkurflugvelli á viku, þær áttu að vera 216.

„Hjá okkur, eins og öðrum, er þetta algjör tekjubrestur og við komumst ekkert í gegn um þetta sumar án þess að fá inn nýtt fé, það liggur algjörlega fyrir.“

Hann telur mikil tækifæri í félaginu, það sótti nýtt eiginfé 2010-2011 í tengslum við endurskipulagningu þá sem nam 70 milljónum Bandaríkjadala og síðan þá hefur félagið skilað hagnaði öll ár nema 2018. Félagið búi vel að því að vera staðsett hér á Íslandi og mörg tækifæri séu í kortunum þegar óvissuástandinu lýkur. Óvissan sé þó mikil og tryggja þarf að allir innviðir haldi sér hjá félaginu á meðan starfsemin er svona lítil.

Gæti tekið mörg ár að ná upp sama ferðamannafjölda

Bogi segir mikilvægt að hagkerfið verði tilbúið að stökkva af stað um leið og færi gefst og þar gegni Icelandair gríðarlega mikilvægu hlutverki. „Ef við verðum ekki til þegar ferðamenn vilja fara að ferðast þá tekur þetta miklu lengri tíma fyrir ferðaþjónustuna að ná sér á strik og skapa tekjur fyrir kerfið.“

Hann segir ljóst að viðsnúningurinn muni taka langan tíma. Það sé ljóst að það muni taka nokkur ár að ná sama fjölda ferðamanna og var 2019. „Markaðirnir munu taka misjafnlega við sér, misjafnlega hratt og við erum með tengingar við svo marga staði bæði í Evrópu og Norður-Ameríku og getum þá stokkið inn á þá staði sem eru að taka við sér.

Félagið hefur verið í miklum samskiptum við stjórnvöld frá því að þetta ástand hófst. Vinnuhópur hefur tekið til starfa hjá Icelandair sem er í nánu samstarfi við stjórnvöld við endurskipulagningu efnahagsreiknings félagsins. „Við stefnum á að gefa út nýtt hlutafé, við teljum að það sé nauðsynlegt að styrkja efnahagsreikninginn með eigiðfé. Félagið vantar ekki skuldir og til að félagið verði tilbúið í þessa viðspyrnu er ekki gott að koma í gegn um þetta ástand í öndunarvélum, við verðum að vera í sterkri stöðu.“

„Uppleggið sem við erum að vinna með, en það eru hvergi vilyrði eða loforð eða skilyrði neins staðar eru að það komi fjárfestar að félaginu og hugsanlega í framhaldinu komi ríkið með einhverjar lánalínur.“