Viðskipti innlent

Icelandair flýgur tugi ferða með lækningavörur frá Kína til Evrópu

Stefán Ó. Jónsson skrifar
Myndin er tekin þegar ein af vélum Icelandair lenti á dögunum með lækningatæki frá Kína.
Myndin er tekin þegar ein af vélum Icelandair lenti á dögunum með lækningatæki frá Kína. vísir/jói k.

Þremur Boeing 767 breiðþotum Icelandair verður breytt tímabundið til að sinna hið minnsta 45 fraktflugferðum frá Sjanghæ í Kína til Munchen í Þýskalandi. Fluttar verðar lækninga- og hjúkrunarvörur fyrir aðila í heilbrigðisþjónustu í Evrópu. Auk þess hyggst Icelandair fljúga „nokkur flug“ frá Sjanghæ til Chicago í Bandaríkjunum með viðkomu á Íslandi. Í skeyti Icelandair vegna málsins segir að um sé að ræða dagleg flug til Kína en fyrsta flugið fer frá Íslandi á morgun, laugardaginn 25. apríl.

Fyrrnefndar Boeingþotur eru taldar henta vel fyrir þetta verkefni, þær séu langdrægar og geti borið töluvert af frakt. Icelandair hefur þegar flogið þrisvar frá Kína með lækningavörur til Íslands.

Icelandair Cargo og Loftleiðir Icelandic, dótturfélög Icelandair Group hafa umsjón með undirbúningi og framkvæmd verkefnisins en á annað hundrað starfsmanna Icelandair Group munu koma að verkefninu. Hver áhöfn telur 12 manns – flugmenn, flugvirkja og hlaðmenn – og þá koma tugir annarra starfsmanna að verkefninu við undirbúning og skipulagningu. Auk þess segir Icelandair að breyting á flugvélunum fari fram hér á landi.

Um sé að ræða að lágmarki 45 ferðir en samkomulag er á milli Icelandair og flutningamiðlunarfyrirtækisins DB Schenker að halda uppi daglegu flugi til Kína og bæta við ferðum á meðan ástandið varir. „Til viðbótar er félagið að ganga frá samningi um leigu á fjórðu Boeing 767 vélinni til annara aðila sem áforma einnig fraktflug milli Kína og Evrópu með samskonar varning,“ segir í skeyti Icelandair.

Kærkomið verkefni á kórónuveirutímum

Haft er eftir Boga Nils Bogasyni, forstjóra Icelandair Group, að tekjurnar af þessu verkefni séu kærkomnar á erfiðum tímum. Mikil alþjóðleg samkeppni sé um sambærileg verkefni og ánægjulegt að hafa náð þessum samningi.

„Það sýnir þá víðtæku sérþekkingu sem félagið býr yfir og útsjónarsemi starfsfólks sem oft kemur fram við erfiðar aðstæður. Þá búum við einnig yfir þeim sveigjanleika að geta brugðist hratt við og tekist á við verkefni sem þetta, með stuttum fyrirvara. Þarna sameinast reynsla okkar og þekking á fraktflutningum og skipulagningu leiguflugs, ásamt tengslaneti víða um heim,“ segir Bogi og bætir við:

„Einnig hafa sérfræðingar okkar í tæknideild Icelandair ráðist í það óvenjulega verkefni að endurhanna farþegarými vélanna til þess að hægt sé að flytja frakt í stað farþega. Þetta eru mikilvægar tekjur fyrir félagið af flugvélum sem annars hefðu setið á jörðinni án verkefna í ljósi þeirra aðstæðna sem ríkja í dag,“ segir Bogi.

Þá skapi þetta jafnframt verkefni fyrir starfsfólk Icelandair, en undirbúningur, skipulag og framkvæmd fer öll fram hér á landi, ásamt fluginu sjálfu, sem verður í höndum starfsmanna fyrirtækisins.


Tengdar fréttir

Boðað til starfsmannafundar hjá Icelandair

Að því er segir í tilkynningu til starfsmanna um fundinn mun Bogi Nils Bogason, forstjóri fyrirtækisins, fara yfir stöðu mála og svara þeim spurningum sem starfsmenn kunna að hafa.

Mun harðari niðurskurður blasir við Icelandair

Forstjóri Icelandair segir mun harðari niðurskurð blasa við félaginu en í síðasta mánuði. Ætlunin er að fyrirtækið verði tilbúið til að geta nýtt sér öll þau tækifæri sem blasa við Íslandi þegar faraldurinn er afstaðinn.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.