Mótmæltu langri bið og slæmum aðbúnaði

„Þeir þurfa meiri stuðning og að fá að gera eitthvað og betri aðgang að heilbrigðisþjónustu,“ segir Lea María Lemarquis sem er í samtökunum Ekki fleiri brottvísanir en þau berjast fyrir bættum aðstæðum fyrir hælisleitendur.

Á laugardag stóðu samtökin fyrir mótmælagöngu í Reykjavík þar sem mótmælt var slæmri meðferð yfirvalda í garð hælisleitenda, löngum biðtíma, slæmum aðstæðum á gistiheimilinu Fit, mismunun af hálfu lögreglu, niðurlægjandi viðmóti Útlendingastofnunar í garð þeirra, brottvísunum og það að þeim sé bannað að vinna meðan þeir bíða svara.

„Við viljum hjálpa hælisleitendum að rjúfa einangrunina. Þeir finna ekki fyrir miklum stuðningi og eru mjög faldir í samfélaginu,“ segir Lea en þeir hælisleitendur sem voru með í mótmælunum eru átta karlmenn frá Afríku sem búsettir eru í Reykjavík. Tveimur þeirra hefur verið synjað um dvalarleyfi.

Lea segir yfirvöld þurfa að laga margt í málefnum hælisleitenda. „Eins og að þeir fái aðgang að heilbrigðisþjónustu, það hefur reynst þeim mjög erfitt. Sérstaklega í alvarlegri málum. Einn hælisleitandi sem er hér núna er með sýkingu í höfði eftir hnífstungu sem hann fékk í höfuðið frá Boko Haram-liða. Hann hefur farið til lækna sem segja að þetta sé mjög alvarlegt og muni annaðhvort skaða sjón hans eða heila. Hann þarf að fara í aðgerð en fær það ekki vegna þess að hann á ekki rétt á þeirri heilbrigðisþjónustu.“

Í gær mótmæltu svo hælisleitendur sem búa á Fit hosteli hjá Félagsmálastofnun Suðurnesja. Adam Ibrahim Pasha er einn þeirra sem mótmæltu. Hann kom hingað til lands í júlí og fékk neitun um dvalarleyfi en kærði þann úrskurð.

Adam er gyðingur og segist hafa sótt ofsóknum vegna þess bæði í heimalandinu Írak og í Slóvakíu þegar hann fékk hæli þar. „Við viljum fá einhver svör og betri aðstæður,“ segir hann.

Adam segir mótmælendurna ekki hafa fengið góðar móttökur hjá félagsþjónustunni. „Þau sögðust ætla að hringja á lögregluna ef við myndum ekki fara. Við ætlum að hafa samband við Rauða krossinn og Útlendingastofnun út af þessu. Ef þau vilja ekki hjálpa okkur þá neyðumst við til að fara í hungurverkfall,“ segir Adam og tekur fram að sálrænt ástand hælisleitendanna sé í mörgum tilfellum mjög slæmt.

„Það er mjög erfitt að bíða svona lengi í óvissu,“ segir Adam um mótmælin.