Lögreglumennirnir svitnuðu í lófunum og titruðu í hnjánum

Lögreglumenn á Keflavíkurflugvelli fengu mynd af sér með leikkonunni Evu Mendes þegar hún átt leið um flugvöllinn í morgun. Á Facebook-síðu lögreglustjórans á Suðurnesjum segir að lögreglumennirnir hafi ekki getað staðist freistinguna.

Eva Mendes hefur dvalið hér á landi síðustu vikur með kærastanum sínum Ryan Gosling sem vinnur hörðum höndum með Valdísi Óskarsdóttur við að klippa fyrstu myndina sem hann leikstýrir, How to Catch a Monster.

„Eva var hin vingjarnlegasta og var alveg til í myndatöku. Hún hafði eitthvað á orði að hún liti ekki vel út og væri illa sofin, okkar menn voru auðvitað langt í frá sammála því! Það er ekki laust við að það hafi örlað á hraðari hjartslætti, sveittum lófum og titrandi hnjám við þessa myndatöku.....og jú...löggustrákarnir voru nokkuð spenntir yfir þessu líka!“ segir á síðunni.