Steven Gerrard: Við áttum skilið að skora þetta mark

Liverpool tryggði sér enn á ný sigur með marki í lokamínútunum í ensku úrvalsdeildinni í dag. Yossi Benayoun skoraði markið mikilvæga í uppbótartíma í 1-0 sigri á Fulham en það kom Liverpool upp fyrir Manchester United og alla leið upp í toppsætið.

„Þetta eru rosalega mikilvæg þrjú stig. Við vissum það fyrir leikinn að allt annað en þrjú stig væri ekki nægilega gott," sagði Steven Gerrard, fyrirliði Liverpool eftir leikinn.

„Ég veit að markið kom seint en við áttum skilið að skora þetta mark. Við skutum fimm sinnum í tréverkið en ég var farinn að halda að þetta ætlaði ekki að vera okkar dagur. Þá birtist Yossi. Hann er sérstakur leikmaður," sagði Gerrard og bætti við.

„Hann er ekki búinn að spila alla leiki en þetta sýnir hversu mikilvægir allir í leikmannahópnum eru," sagði Gerrard.

Manchester United getur komist aftur á toppinn þegar liðið mætir Aston Villa á morgun. „Við sjáum til hvernig þetta gengur hjá United en við erum að vonast eftir greiða frá Villa. Það eina sem við getum gert er að reyna að halda áfram að vinna okkar leiki," sagði Gerarrd.