Scholes kippir sér ekki upp við það að Roy Keane valdi hann ekki í draumaliðið sitt

Roy Keane er ekki þekktur fyrir að liggja á skoðunum sínum og þegar hann var beðinn um að velja draumalið sitt á tíma sínum hjá Manchester United vakti athygli margra að í liðinu var enginn Paul Scholes.

Árið 2013 var Keane beðinn um að velja draumalið sitt fyrir heimildarmynd á ITV og með honum á miðjunni voru þeir Paul Ince, David Beckham og og Eric Cantona. Ekkert pláss fyrir hinn sigursæla Scholes.

Þegar Keane valdi þetta lið var Patrick Vieira einnig í settinu og hann spurði strax hvar Scholes væri. „Að hafa átt frábæran feril þýðir ekki að þú sért frábær leikmaður. Það er mikill munur þar á. Á ég að skilja Ronaldo einn besta leikmann heims eftir? Eða Beckham?“

Scholes var í hlaðvarpsþætti Manchester United á dögunum þar sem hann var spurður út í þetta liðsval Írans og það mátti heyra á Scholes að þetta truflaði hann lítið sem ekkert.

„Þegar fólk velur þeirra lið þá eru mismunandi skoðanir. Ég og David May gætum setið hér í allan dag og valið tíu mismunandi lið með öllum þessum frábæru leikmönnum sem við spiluðum með. Þetta truflaði mig ekki og gerir það ekki enn,“ sagði Scholes.