Erlent

Maduro ákærður fyrir fíkniefnabrot í Bandaríkjunum

Kjartan Kjartansson skrifar
Maduro forseti með grímu fyrir vitum sér á fundi um kórónuveirufaraldurinn í Miraflores-forsetahöllinni í Caracas á sunnudag. Hann verður ákærður fyrir fíkniefnabrot í Bandaríkjunum.
Maduro forseti með grímu fyrir vitum sér á fundi um kórónuveirufaraldurinn í Miraflores-forsetahöllinni í Caracas á sunnudag. Hann verður ákærður fyrir fíkniefnabrot í Bandaríkjunum. Vísir/EPA

Alríkissaksóknarar í Bandaríkjunum ætla að ákæra Nicolas Maduro, forseta Venesúela, fyrir fíkniefnabrot í dag. Ákæran er sögð afurð rannsóknar sem teygði anga sína til Washington, New York og Flórída. Búist er við því að á annan tug venesúelskra embættismanna og liðsmanna kólumbísku skæruliðasveitanna FARC verði ákærður í málinu.

New York Times fullyrðir að bandaríska dómsmálaráðuneytið ætli að tilkynna um ákærurnar í dag. Lítið liggi enn fyrir um efni ákæranna annað en að þær varði svonefnd fíkniefnahryðjuverkabrot og samsæri um innflutning á kókaíni til Bandaríkjanna.

Á meðal þeirra sem eru sagðir verða ákærðir með Maduro eru venesúelskir leyniþjónustumenn, ríkisstjórn landsins og liðsmenn FARC. Skæruliðasamtökin eru lengi talin hafa fjármagnað sig með fíkniefnasmygli.

Bandaríkjastjórn viðurkennir Maduro ekki sem forseta Venesúela eftir umdeildar forsetakosningar í landinu árið 2018. Þess í stað telja þau Juan Guaidó réttmætan forseta Venesúela. Hann var forseti þingsins þegar hann lýsti sjálfan sig lögmætan forseta í janúar í fyrra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.