Risa bros, bjartir litir og köld sturta meðal ráða frá Anníe Mist

Anníe Mist Þórisdóttir vill hjálpa sínum aðdáendum að komast í gegnum streituvaldandi tíma nú þegar mjög margir eru í sóttkví og hafa um leið áhyggjur af vinum og ættingjum.

Það þarf ekki að koma neinum á óvart að Anníe Mist Þórisdóttir reyni að finna jákvæðu hlutina í erfiðri stöðu og hún vildi láta aðra vita af því hvernig hún vinnur streitunni hjá sér.

Anníe Mist á von á dóttur í haust en er samt ekkert hætt að æfa. Hún er dugleg að leyfa öllum að fylgjast með hvernig hún tekst á við það verkefni að sameina óléttuna og æfingarnar.

Anníe Mist tók síðan það saman hvað hún gerir sjálf til að koma sér af stað á þungum og erfiðum morgnum eins og sjá má hér fyrir neðan.

„Það er fullkomlega eðlilegt að finna fyrir smá stressi en ekki láta það hafa of mikil áhrif. Þú veist að það er enginn einn. Við gerum þetta saman,“ skrifaði Anníe Mist.

Hún tók síðan saman dæmi um hvað hún gerir á morgnanna:

Fara í sturtu og gott að enda á kaldri sturtu. Prófið það, það er frábært.

Taka til hárið og farða sig

Klæða mig í bjarta liti sem fær mig alltaf til að brosa

Risa bros

Borða uppáhalds morgunmatinn (Hrærð egg með chorizo og tómati og svo með hafragrautur með söltuðum hnetum og rúsínum).

Skrifa niður þrjá hluti sem ég ætla að klára í dag.

Það er alltaf gott að fá góð ráð frá fólki sem hugsar jafnvel um líkamann sinn og Anníe Mist Þórisdóttir gerir.

Þessi tvöfaldi heimsmeistari í CrossFit er frábær fyrirmynd og er líka mjög dugleg að sjá björtu hliðarnar. Hér fyrir neðan kemur hún síðan með annað dæmi.