Fótbolti

Stjóri Alberts látinn taka pokann sinn

Arnar Geir Halldórsson skrifar
Arne Slot ásamt Alberti Guðmundssyni.
Arne Slot ásamt Alberti Guðmundssyni. vísir/Getty

Hollenska úrvalsdeildarliðið AZ Alkmaar hefur rekið Arne Slot úr starfi knattspyrnustjóra félagsins eftir að hann sýndi starfi Feyenoord áhuga.

Slot tók við AZ síðasta sumar og stýrði liðinu til silfurverðlauna í hollensku úrvalsdeildinni á síðustu leiktíð en liðið situr nú í sjöunda sæti deildarinnar, taplaust í fyrstu níu leikjunum en hefur gert fimm jafntefli.

Í gær birtust fréttir þess efnis að Slot væri líklegastur til að taka við Feyenoord af Dick Advocaat þegar gamla brýnið mun hætta að þjálfa.

Í yfirlýsingu AZ Alkmaar sem gefin var út í morgun segir að félagið hafi fundað með Slot í kjölfar fréttanna og niðurstaða fundarins var sú að hann myndi yfirgefa félagið þegar í stað. Í yfirlýsingunni segir jafnframt að félagið vilji að aðalþjálfari félagsins sé fullkomlega einbeittur á framtíð AZ.

Pascal Jansen, sem var aðstoðarmaður Slot, mun taka við stjórnartaumunum og stýra liðinu út tímabilið.

Íslenski landsliðsmaðurinn Albert Guðmundsson leikur með liðinu og hefur verið í stóru hlutverki á yfirstandandi leiktíð.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.