Sport

Katrín Tanja vann sér inn alls 18,7 milljónir króna með frammistöðu sinni

Óskar Ófeigur Jónsson skrifar
Katrín Tanja Davíðsdóttir með öllum verðlaunahöfunum á heimsleikunum í ár.
Katrín Tanja Davíðsdóttir með öllum verðlaunahöfunum á heimsleikunum í ár. Twitter/@crossfitgames

Katrín Tanja Davíðsdóttir fékk ekki bara silfrið um hálsinn eftir frábæran árangur sinn á heimsleikunum í CrossFit því hún fékk líka nóg af peningum í bankann.

Katrín Tanja fékk alls 134 þúsund Bandaríkjadali fyrir helgina, 115 þúsund dali fyrir að ná öðru sætinu í keppninni og svo nítján þúsund dollara að auki fyrir að ná einu af þremur efstu sætunum í einstökum greinum.

Katrín Tanja endaði aðeins einu sinni meðal þriggja efstu í fjórum fyrstu greinunum og sat þá í neðsta sæti í heildarkeppninni. Hún vann hins vegar lokagrein fyrsta dagsins og var fimm sinnum meðal þeirra þriggja efstu í sex síðustu greinunum.

Katrín Tanja vann eina grein en fyrir það fengu keppendur þrjú þúsund dollara bónus. Katrín varð þrisvar sinnum í öðru sæti í grein og fékk tvö þúsund dollara fyrir hvert skipti. Hún varð síðan fjórum sinnum í þriðja sæti í grein og fékk þúsund dollara fyrir hvert skipti. Að auki vann hún einnig tvær greinar í fyrri hlutanum.

Katrín Tanja fékk 6,5 milljónum meira en Kari Pearce sem varð í þriðja sæti en hún fékk alls 87 þúsund Bandaríkjadali fyrir helgina. Það munaði því mikið um hvert sæti í keppninni.

Heimsmeistarinn Tia-Clair Toomey vann sér inn alls 342 þúsund dollara eða 47,7 milljónir íslenskra króna og var því 29 milljón króna munu á henni og Katrínu Tönju.

Mathew Fraser fékk aðeins meira en Toomey þar sem hann vann fleiri greinar og endaði aldrei neðar en í öðru sæti. Fraser fékk alls 348 þúsund dollara eða 48,5 milljónir íslenskra króna.

Verðlaunaféð í ofurúrslitum heimsleikanna 2020:

Konur:

  • 1. Tia-Clair Toomey – $342,000 ($42,000 fyrir árangur í einstökum greinum)
  • 2. Katrín Tanja Davíðsdóttir – $134,000 ($19,000)
  • 3. Kari Pearce – $87,000 ($12,000)
  • 4. Haley Adams – $60,000 ($10,000)
  • 5. Brooke Wells – $48,000 ($13,000)

Karlar:

  • 1. Mathew Fraser – $348,000 ($48,000 fyrir árangur í einstökum greinum)
  • 2. Samuel Kwant – $128,000 ($13,000)
  • 3. Justin Medeiros – $89,000 ($14,000)
  • 4. Noah Ohlsen – $63,000 ($13,000)
  • 5. Jeffrey Adler – $43,000 ($8,000)



Fleiri fréttir

Sjá meira


×