Enski boltinn

Sakar Pickford um „algjöra heimsku“ og Everton um að ganga of langt

Sindri Sverrisson skrifar
Jordan Pickford meiddi Virgil van Dijk alvarlega með þessari tæklingu en slapp við refsingu.
Jordan Pickford meiddi Virgil van Dijk alvarlega með þessari tæklingu en slapp við refsingu. Getty/John Powell

Georginio Wijnaldum segir að leikmenn Everton gangi of langt í nágrannarimmum við Liverpool. Brot Jordan Pickford á Virgil van Dijk hafi verið „algjör heimska“.

Wijnaldum ræddi um vin sinn Van Dijk á blaðamannafundi í gær fyrir leikinn við Ajax í Hollandi í kvöld, í Meistaradeild Evrópu. Ljóst er að miðvörðurinn verður frá keppni næstu mánuðina, hugsanlega út leiktíðina, vegna krossbandsmeiðsla í hné eftir að Pickford tæklaði hann illa í Bítlaborgarslagnum um helgina.

„Erum enn niðurbrotnir“

„Við erum enn niðurbrotnir og mér fannst þetta alls ekki eðlilegt. Það líður öllum enn mjög illa yfir þessu. Þegar við leikmennirnir hittumst aftur og töluðum samna hafði enginn okkar getað sofið vegna þess sem kom fyrir Virgil, og vegna þess hvernig þetta gerðist. Það er mjög erfitt að kyngja þessu og þetta er erfitt fyrir liðið,“ sagði Wijnaldum.

„Við erum í uppnámi. Það hvernig Pickford fór í tæklinguna var algjör heimska að mínu mati. Ég held að hann hafi ekki viljað meiða Virgil en hann fór í tæklinguna með þannig hætti að honum var í raun alveg sama um hverjar afleiðingarnar af henni yrðu,“ sagði Wijnaldum og gagnrýndi enn frekar Gylfa Þór Sigurðsson og félaga:

Ganga of langt

„Við höfum oft mætt Evertonmönnum og að mínu mati ganga þeir of langt í leikjunum gegn okkur. Við vitum að þetta er grannaslagur og allir vilja vinna, svo að stundum fara menn aðeins yfir strikið, en þetta var of mikið. Þetta var ekki bara tæklingin hjá Pickford, við getum líka rætt tæklingu Richarlison á Thiago sem var einnig mjög gróf. Þetta er það sem angraði mig mest og ég held að það eigi við um hina leikmennina.“

Ajax og Liverpool mætast í beinni útsendingu á Stöð 2 Sport 4 kl. 19 í kvöld. Í Meistaradeildarmessunni á Stöð 2 Sport 2 er fylgst með gangi mála í öllum leikjum kvöldsins og mörkin sýnd um leið og þau eru skoruð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.