Betri völlur, fleiri skiptingar, VAR og hundruð áhorfenda

Það hefur ýmislegt breyst frá því að Ísland átti að mæta Rúmeníu 26. mars. Hvaða reglur verða í gildi þegar liðin mætast loks á fimmtudag, hvaða leikmenn spila og hvernig verður veðrið?

Laugardalsvöllur var snævi þakinn að morgni 26. mars. Snjóinn leysti yfir daginn og um kvöldið hefði margra mánaða undirbúningur og vinna vallarstarfsmanna getað skilað sér í því að undanúrslitaleikur í EM-umspili færi fram á vellinum. Ekkert varð af því og eflaust þekkja allir ástæðuna.

Völlurinn er hins vegar klárlega í betra ástandi núna en í mars, enda aldrei verið spilað þar í þeim mánuði en oft verið spilað í október. Veðurspáin er auk þess ágæt í vikunni og á fimmtudagskvöld er útlit fyrir milt veður og nokkurra stiga hita.

Kórónuveirufaraldurinn leiddi ekki bara til þess að leiknum var frestað. Nú gilda aðrar reglur, innan sem utan vallar. Að minnsta kosti er það þannig núna að fimm skiptingar verða leyfðar hjá hvoru liði, eða sex ef að gripið verður til framlengingar. Þetta ákvað UEFA að gera vegna aukins álags á leikmenn.

VAR í fyrsta sinn á Íslandi

Eftir sem áður verður myndbandsdómgæsla, VAR, á leiknum í fyrsta sinn á Íslandi. Dómari leiksins mun því geta nýtt tæknina til að skera úr um möguleg vafaatriði.

Faraldurinn gerði eins og frægt er orðið að verkum að ekki verða 9.800 stuðningsmenn á leiknum. Rúmenskir stuðningsmenn, búsettir hérlendis, hugðust fjölmenna á leikinn og uppselt var samdægurs, en miðarnir voru endurgreiddir í síðustu viku.

Svo kom reyndar í ljós að UEFA myndi leyfa áhorfendur, 30% þess fjölda sem kæmist fyrir á vellinum, en sóttvarnareglur á Íslandi trompa þær reglur og getur KSÍ því aðeins selt 900 miða á leikinn. Stuðningsmennirnir 900 verða á víð og dreif um stúkurnar en láta væntanlega vel í sér heyra í gegnum sóttvarnagrímurnar, eins og Erik Hamrén landsliðsþjálfari hefur kallað eftir.

Birkir var fastur á Ítalíu og óvissa um Jóhann

Væntanlegt byrjunarlið Íslands hefur ekki breyst á síðustu sjö mánuðum, þó að ekkert sé hægt að útiloka. Í mars líkt og nú ríkti óvissa um hvort og hve mikinn þátt Jóhann Berg Guðmundsson gæti tekið í leiknum vegna meiðsla. Hann kvaðst í vor hafa verið orðinn klár í slaginn fyrir Rúmeníuleikinn, og komst sömuleiðis aftur á ferðina með Burnley um liðna helgi.

Erik Hamrén telur sig alla vega stillt upp sínu sterkasta liði núna. Þó hefur Kári Árnason ekki getað spilað með Víkingi R. undanfarið vegna smávægilegra meiðsla. 

Birkir Bjarnason virtist fastur á Ítalíu í mars, en faraldurinn var þá langskæðastur þar í landi í Evrópu, en Emil Hallfreðsson hafði náð að koma sér frá Ítalíu til Íslands. Emil var hins vegar ekki valinn í landsliðshópinn nú.

Eins hefur það breyst frá því í mars að FIFA heimilar núna félagsliðum að banna leikmönnum að spila landsleiki, þurfi þeir að fara í fimm daga sóttkví í tengslum við ferðalag frá eða til síns heimalands. Þannig gat Al Arabi frá Katar bannað Aroni Einari Gunnarssyni að spila gegn Rúmeníu á fimmtudaginn, en Hamrén náði samkomulagi við Heimi Hallgrímsson þjálfara Al Arabi um að Aron yrði með í leiknum.

Hamrén þyrfti að ná sams konar samkomulagi í nóvember ef Ísland kæmist í úrslitaleik umspilsins. Ísland myndi þá mæta sigurliðinu úr leik Ungverjalands og Búlgaríu, á útivelli, 12. nóvember. Sigur í þeim leik myndi skila Íslandi á EM, í riðil með heimsmeisturum Frakklands, Evrópumeisturum Portúgals og Þýskalandi, næsta sumar.