Íslenski boltinn

Valsmenn búnir að setja nýtt met í mörkum skoruðum á útivelli

Óskar Ófeigur Jónsson skrifar
Birkir Már Sævarsson fagnar öðru marka sinna á móti FH í gær með félögum sínum í Valsliðinu. Það var einmitt mark Birkis í 5-1 sigrinum á Stjörnunni, fjórum dögum fyrr, sem færði Valsmönnum metið.
Birkir Már Sævarsson fagnar öðru marka sinna á móti FH í gær með félögum sínum í Valsliðinu. Það var einmitt mark Birkis í 5-1 sigrinum á Stjörnunni, fjórum dögum fyrr, sem færði Valsmönnum metið. Vísir/Vilhelm

Valsmenn stigu ekki aðeins stórt skref í átt að Íslandsmeistaratitlinum með tveimur frábærum útisigrum á fjórum dögum þeim tókst líka að setja í leiðinni nýtt glæsilegt markamet.

Valsmenn hafa skorað níu mörk í síðustu tveimur útileikjum og það á heimavöllum liðanna sem voru að keppa við þá um Íslandsmeistaratitilinn. Við segjum voru af því að titilbaráttan er búin eftir 4-1 sigur Vals á FH í Kaplakrika í gær. Valur hafði áður unnið 5-1 sigur á Stjörnunni í Garðabænum.

Valsliðið hefur með þessu skorað 35 mörk í 9 útileikjum á þessu tímabili eða 3,9 mörk að meðaltali í leik.

Valsmenn slógu með þessu tíu ára gamalt met KR-inga frá árinu 2010. KR-liðið skoraði þá 30 mörk og varð fyrsta liðið til að rjúfa 30 marka múrinn.

KR-ingar höfðu þá slegið 32 ára met Skagamanna frá árinu 1978 sem skoruðu tveimur mörkum minna en líka í tveimur færri leikjum.

Valsmenn eru bara búnir að spila níu af ellefu útileikjum sínum og eiga því möguleika á að brjóta 40 marka útivallarmarkamúrinn fyrstir liða í sögu Íslandsmótsins. Síðustu tveir útileikir liðsins eru á móti Fylki í Árbænum og KA á Akureyri.

Valsliðið hefur unnið níu fyrstu útileiki sína og eru líka 24 mörk í plús utan Hlíðarenda (35-11). Liðið á því ennþá möguleika á að enda með fullt hús á útivelli í sumar.

  • Flest mörk á útivelli á einu tímabili í efstu deild karla:
  • 35 mörk - Valur 2020
  • 30 mörk - KR 2010
  • 28 mörk - KR 2009 og ÍA 1978
  • 27 mörk - FH 2009, FH 2005 og ÍA 1993
  • 26 mörk - FH 2013, Valur 2013 og FH 2008
  • 25 mörk - FH 2014
  • 24 mörk - KR 1960
  • Methafarnir frá að farið var að spila heima og að heiman árið 1959:
  • 15 mörk - KR 1959 (5 leikir)  - átti metið í 1 ár
  • 24 mörk - KR 1960 (5 leikir) - átti metið í 18 ár
  • 28 mörk - ÍA 1978 (9 leikir) - átti metið í 32 ár
  • 30 mörk - KR 2010 (11 leikir )- átti metið í 10 ár
  • 35 mörk - Valur 2002 (9 leikir búnir af 11)


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.