Erlent

Fyrrverandi ráðgjafi Pence segir Trump standa á sama um mannslíf

Kjartan Kjartansson skrifar
Pence varaforseti hefur leitt aðgerðahóp Hvíta hússins vegna kórónuveirunnar. Hann svaraði spurningum fréttamanna um gagnrýni Troye, fyrrverandi ráðgjafa hans, í gær.
Pence varaforseti hefur leitt aðgerðahóp Hvíta hússins vegna kórónuveirunnar. Hann svaraði spurningum fréttamanna um gagnrýni Troye, fyrrverandi ráðgjafa hans, í gær. AP/Andrew Harnik

Háttsettur ráðgjafi Mike Pence varaforseta Bandaríkjanna sem sat í aðgerðahóp Hvíta hússins vegna kórónuveirufaraldursins en sagði af sér í síðasta mánuði hefur lýst yfir stuðningi við Joe Biden, frambjóðanda demókrata. Hann segir að viðbrögð ríkisstjórnarinnar við faraldrinum sýni að Donald Trump forseta „standi algerlega á sama um mannslíf“.

Olivia Troye, sem var þjóðaröryggis-, hryðjuverka- og kórónuveiruráðgjafi Pence, lét af störfum í ágúst. Hún segist hafa verið repúblikani alla sína tíð en reynsla hennar í Hvíta húsinu hafi sannfært hana um að greiða Biden atkvæði sitt í forsetakosningunum 3. nóvember.

„Orðræða forsetans og árásir hans á fólk innan ríkisstjórnarinnar sem er að reyna að vinna vinnuna sína auk þess sem hann dreifir fölskum frásögnum og röngum upplýsingum um veiruna hefur gert áframhaldandi viðbrögðin að klúðri,“ segir Troye í viðtali við Washington Post.

Um 200.000 manns hafa látið lífið í kórónuveirufaraldrinum í Bandaríkjunum, fleiri en í nokkru öðru ríki. Viðbrögð alríkisstjórnar Trump við honum hafa verið harðlega gagnrýnd. Trump hefur vísvitandi og gegn betri vitund gert lítið úr alvarleika faraldursins og ríkisstjórn hans vanrækt að búa til áætlun um skimun og smitrakningu.

Alríkisstjórnin kaus einnig að láta einstök ríki sjá um að bregðast við veirunni sem leiddi til þess að þau þurftu að keppa sín á milli um nauðsynlegan búnað, þar á meðal öndunarvélar og hlífðarbúnað.

Sleppur við að taka í höndina á „viðbjóðslegu“ fólki

Troye fer hörðum orðum um forsetann og viðbrögð stjórnarinnar við faraldrinum. Ráðgjafar Pence hafi fyrirlitið vísindamenn sem ráðlögðu ríkisstjórninni og vildu þess í stað draga upp mun bjartsýnni mynd af stöðunni en efni stóðu til. Trump sjálfur hafi svo ítrekað grafið undan ráðleggingum yfirvalda opinberlega, þar á meðal um grímunotkun og félagsforðun.

Sjálf segist Troye myndu taka bóluefni gegn veirunni sem væri samþykkt fyrir kosningar með miklum fyrirvara.

„Ég myndi ekki ráðleggja neinum sem mér er annt um að taka bóluefni sem kæmi fyrir kosningarnar. Ég myndi hlusta á sérfræðingana […] og ég myndi bíða til að fullvissa mig um að bóluefnið væri öruggt en ekki leikmunur sem tengdist kosningunum,“ segir Troye sem tók ríkan þátt í starfi aðgerðahópsins sem Pence stýrði.

Trump var sjálfur sjaldnast viðstaddur fundi aðgerðahópsins. Á einum þeim fáu fundum sem hann mætti á varði hann 45 mínútum í að ræða um hversu illa tilteknir sjónvarpsmenn á Fox News-sjónvarpsstöðinni kæmu fram við hann.

Í myndbandi sem Troye kemur fram í fyrir hóp repúblikana sem vinnur gegn endurkjöri Trump fullyrðir hún að Trump hafi séð björtu hliðarnar á faraldrinum á einum fundanna í Hvíta húsinu. Sóttvarnareglur þýddu að hann þyrfti ekki að taka í höndina á „þessu viðbjóðslega fólki“. Þar hafi forsetinn átt við sína eigin stuðningsmenn en sýklahræðsla hans er víðfræg.

„Sannleikurinn er að honum er sama um alla nema sjálfan sig,“ segir Troye í myndbandinu.

Afskrifa Troye sem óánægðan fyrrverandi starfsmann

Trump og Pence afskrifuðu gagnrýnina og  Troye sem „óánæðan fyrrverandi starfsmann“. Hvíta húsið fullyrti í yfirlýsingu að Troye hafi hætt því hún hafi ekki verið starfi sínu vaxin.

„Ég hef ekki hugmynd um hver hún er. Ég hef aldrei hitt hana, eftir því sem ég veit best. Kannski var hún í herbergi. Ég hef enga hugmynd um hver hún er. Hún þekkir mig ekki,“ sagði Trump við fréttamenn í gær.

Pence, sem Troye tók sérstaklega fram að hún vildi ekki gagnrýna, sagðist ekki hafa lesið ummæli henni nákvæmlega.

„En mér virðist þetta vera enn einn óánægði fyrrverandi starfsmaðurinn sem hefur ákveðið að blanda sér í pólitík á kosningaári,“ sagði Pence.


Tengdar fréttir

Trump sagður ljúga meðvitað um kórónuveiruna

Alvarleiki kórónuveirufaraldursins var Donald Trump Bandaríkjaforseta fullljós í vetur á sama tíma og hann sagði almenningi að veiran væri ekki hættulegri en hefðbundin flensa.

Bush á meðal repúblikana sem ætla ekki að kjósa Trump

Nokkrir áhrifamenn í Repúblikanaflokknum ætla annað hvort ekki að kjósa Donald Trump í forsetakosningunum í haust eða jafnvel greiða Joe Biden, frambjóðanda demókrata, atkvæði sitt. George W. Bush, fyrrverandi forseti, er á meðal þeirra sem ætlar ekki að styðja Trump til endurkjörs.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.