Sara Sigmundsdóttir hefur verið í mikli stuði undanfarin CrossFit-tímabil en það hefur lítið gengið upp hjá henni á heimsleikunum sjálfum undanfarin tvö ár.

Sara hefur ekki náð að klára tvo síðustu heimsleika, fyrst varð hún að hætta vegna meiðsla og svo lenti hún í umdeildum niðurskurði í fyrra. Enn á ný er Sara meðal þeirra sem spáð er góðu gengi á heimsleikunum og hún er ein af þeim sem Tommy Marquez á Morning Chalk Up spáir áfram í fimm manna ofurúrslit.

Tommy Marquez er að telja niður í leikanna með því að kynna það íþróttafólk sem hann telur vera líklegast til afreka á leikunum. Nú síðast var komið að okkar konu Söru Sigmundsdóttur.

Tommy Marquez fór fyrst yfir glæsilega afrekskrá Söru og þá sérstaklega þegar kemur að keppni í gegnum netið. Þar hefur Sara blómstrað þannig að keppnisfyrirkomulagið í fyrri hlutanum ætti að henta henni.

Sara hefur meðal annars unnið „The Open“ tvö undanfarin ár og alls þrisvar sinnum eða oftar en allar aðrar CrossFit konur.

„Eini staðurinn þar sem Sara hefur verið í vandræðum er á keppnisgólfinu í Madison. Hún þarf ekki að hafa áhyggjur af því í ár. Hún getur tryggt sér topp fimm sæti í fjórða sinn á leikunum í sínu umhverfi í Simmagym og mætt síðan til Aromas með miklu minni pressu á sér,“ sagði Tommy Marquez í umfjöllun sinni á Morning Chalk Up.

„Ef að það væri einhvern tímann tímapunktur fyrir Söru til að hrista af sér púka síðustu tveggja heimsleika þá væri það einmitt núna í þessu keppnisfyrirkomulagi. Ég held að hún geri það,“ sagði Tommy Marquez.