Enski boltinn

Sigurhátið Liverpool gæti þurft að fara fram í kyrrþey

Óskar Ófeigur Jónsson skrifar
Leikmenn Liverpool keyra hér um götur Liverpool eftir sigurinn í Meistaradeildinni.
Leikmenn Liverpool keyra hér um götur Liverpool eftir sigurinn í Meistaradeildinni. Getty/Nigel Roddis
Svo gæti farið að stuðningsmenn Liverpool fái ekki tækifæri til að fagna því saman þegar liðið vinnur loks enska meistaratitilinn eftir þrjátíu ára bið. Kórónuveiran gæti lokað á allt slíkt en það er samt spurning hvort stuðningsmenn Liverpool geti hreinlega haldið aftur af sér.

Liverpool er með 25 stiga forystu á toppi ensku úrvalsdeildarinnar og vantar bara sex stig til viðbótar til að tryggja sér langþráðan titil.

Liverpool gæti meira að segja orðið enskur meistari áður en liðið spilar næsta leik en til þess þarf Manchester City að tapa bæði á miðvikudagskvöld og á laugardaginn.

Það er ekki líklegt að það gerist en tapist annar þessara leikja getur Liverpool tryggt sér enska titilinn á Goodison Park á mánudagskvöldið. Það væri draumur margra stuðningsmanna Liverpool að sækja titilinn á Goodson Park og labba síðan á Anfield og fagna saman.







Dragist það eitthvað á langinn að Liverpool tryggi sér titilinn gætu komið upp allt aðrar kringumstæður þegar liðið verður loksins enskur meistari eftir þrjátíu ára bið.

Óvissan vegna kórónuveirunnar þýðir að mögulega verði að klára tímabilið í ensku úrvalsdeildinni með tóma velli. Önnur lönd hafa lokað leikvöngum fyrir áhorfendum og því talsverðar líkur á því að sama verði gert í ensku úrvalsdeildinni.

Það er sem að það sé aðeins tímaspursmál hvenær Liverpool tryggir sér titilinn eru menn þar á bæ að sjálfsögðu farnir að hugsa um að fagna þessum miklu tímamótum.





Fréttir bárust af því fyrir nokkru að Liverpool sé búið að skipuleggja sigurhátíð sína um götur Liverpool í maí enda mörgum enn ferskt í minni þegar Liverpool fagnaði sigrinum í Meistaradeildinni í byrjun júní í fyrra.

Það er hins vegar óvíst hvort Liverpool fái leyfi fyrir slíkri skrúðgöngu í núverandi ástandi. Götur Liverpool voru troðfullar af fólki í júní í fyrra og þar væri smithættan mikil.

Ráðamenn í breska íþróttaheiminum funduðu með breskum yfirvöldum í gær og þar var tekin sú ákvörðun að halda íþróttaleikvöngum opnum fyrir komandi leiki en sá fyrsti af þeim er leikur Manchester City og Arsenal á Ethiad á morgun.

Það má heldur ekki líta framhjá því að það gæti verið erfitt að koma í veg fyrir fögnuð í Liverpool borg þegar titilinn vinnst enda fólkið þar búið að bíða ansi lengi eftir því að vinna ensku úrvalsdeildin.

Enska úrvalsdeildin mun væntanlega meta stöðuna áfram á hverjum degi og það er öruggt að stuðningsmenn Liverpool bíði og voni að þeir þurfi ekki að sjá liðið sitt tryggja sér titilinn fyrir framan tóma stúku eða að sigurhátið Liverpool liðsins þurfi að fara fram í kyrrþey.



Enski boltinn

Mest lesið


Fleiri fréttir

Sjá meira


×

Mest lesið