Hlynnt því að leynd verði aflétt en getur ekki beitt sér fyrir því sérstaklega
Þórdís Kolbrún Reykfjörð Gylfadóttir iðnaðarráðherra segist fylgjandi því að trúnaði verði aflétt af raforkusamningi milli Landsvirkjunar og Rio Tinto. Hún kveðst þó ekki geta í krafti stöðu sinnar beitt sér fyrir því sérstaklega að svo verði.
Þetta kom fram í svari Þórdísar við fyrirspurn Halldóru Mogensen, þingmanns Pírata, í óundirbúnum fyrirspurnatíma á Alþingi í dag. Forstjóri Landsvirkjunar greindi frá því í gær að óskað hafi verið formlega eftir því við forsvarsmenn Rio Tinto að leynd yfir innihaldi samningsins verði aflétt. Halldóra spurði ráðherra hvort hún muni beita sér fyrir því að raforkuverð Landsvirkjunar til stóriðju verði gert opinbert. Þá hefur Rio Tinto jafnframt lýst vilja sínum til að gera slíkt hið sama.
Sjá einnig: Segir óviðeigandi af Rio Tinto að setja fram afarkosti
„Ítrekað hefur verið haldið fram af forsvarsmönnum álveranna og Samorku að orkuverð til stóriðju á Íslandi sé í besta falli í meðallagi en sama fólk hefur ítrekað að trúnaður verði að gilda um raforkuverð þar sem orkufyrirtækin á Íslandi séu í samkeppni við aðra markaði um að draga til sín stóriðjufyrirtæki,“ sagði Halldóra. „Þarna er verið að deila og drottna í krafti ófullkominna upplýsinga á markaði. Hverjum þjónar upplýsingaskortur sem felst í slíku leynimakki?“
Þórdís svaraði því til að henni þyki skortur á gagnsæi hvað þetta varðar ekki vera af hinu góða. „Það setur alla aðila sem vilja taka þátt í málefnalegri umræðu, byggðri á staðreyndum, erfiðara fyrir. Það er mikið um ágiskanir og þeir sem búa yfir þessum upplýsingum eru bundnir trúnaði og geta þar af leiðandi ekki einu sinni sagt það sem þeir þó vita,“ sagði Þórdís.
Hún myndi fagna því mjög ef aðilar samningsins kæmust að þeirri niðurstöðu að birta annað hvort samninginn í heild eða þá lykil þætti sem helst hafi verið rætt um á borð við raforkuverð. „Ég get sjálf í krafti minnar stöðu ekki gert kröfu um að það verði gert enda er þetta viðskiptalegur samningur á milli tveggja aðila. En nú er málið komið í þetta ferli og það verður forvitnilegt að heyra af viðbrögðum fyrirtækisins,“ sagði Þórdís.
Tengdar fréttir
Segir Rio Tinto beita samningatækni og hótunum til að ná vilja sínum fram
Mikið hefur verið rætt um raforkusamning Landsvirkjunnar við Rio Tinto síðustu vikur eftir að stjórnendur sögðust vera að skoða mögulega lokun álversins í Straumsvík.
Segir óviðeigandi af Rio Tinto að setja fram afarkosti
Hörður segir Rio Tinto beita óboðlegri samningatækni en Landsvirkjun hefur formlega óskað eftir því að trúnaði um raforkusamninginn verði aflétt.
Rannveig Rist fer í leyfi
Rannveig Rist, forstjóri Rio Tinto Alcan á Íslandi, er á leiðinni í að minnsta kosti sex mánaða veikindaleyfi. Þetta tilkynnti Rannveig á fundi með starfsmönnum í álverinu á fjórða tímanum í dag.
Telur meiri líkur en minni að Rio Tinto verði hér um ókomin ár
Það er af og frá að til greina komi að Alþingi beiti sér með einhverjum hætti til að hafa áhrif á samninga um kaup álframleiðenda á raforku. Þetta segir Óli Björn Kárason, þingmaður Sjálfstæðisflokksins og formaður efnahags- og viðskiptanefndar Alþingis.
Starfsfólk Isal í tvöföldu áfalli vegna mögulegrar lokunar og kjarasamninga
Starfsfólk Isal er slegið yfir fréttum af mögulegri lokun álversins í Straumsvík og segir áfallið tvöfalt þar sem eigendur hafi stoppað undirritun kjarasamninga.
Segir aðalvanda álversins í Straumsvík liggja í of háu raforkuverði
Rannveig Rist, forstjóri ISAL – álversins í Straumsvík, segir viðræður Rio Tinto, eiganda álversins, um nýjan raforkusamning við Landsvirkjun nýhafnar. Það sé því of snemmt að segja til um árangurinn af þeim viðræðum.
Skoða mögulega lokun álversins í Straumsvík
Rio Tinto ætlar að hefja sérstaka endurskoðun á starfsemi álversins í Straumsvík (ISAL) svo meta megi rekstrarhæfi þess til framtíðar.
