Yfirvöld munu ekki lýsa yfir hættustigi hér á landi vegna kórónuveirunnar sem veldur sjúkdómnum COVID-19 fyrr en smit greinist hér. Enn hefur enginn greinst með veiruna á Íslandi.



Óvissustig er nú í gildi vegna veirunnar en að sögn Rögnvaldar Ólafssonar, aðalvarðstjóra hjá almannavarnadeild ríkislögreglustjóra, eru almannavarnir og heilbrigðisyfirvöld nú þegar farin að vinna að ýmsum verkefnum líkt og hættustig væri í gildi.



Unnið er eftir viðbragðsáætlun almannavarna vegna heimsfaraldurs þótt enn sé ekki formlega búið að lýsa slíkum faraldri yfir. Skilgreiningin á óvissustigi er að nýr faraldur hafi greinst í mönnum og ástæða þykir til aukinnar árvekni og ítarlegs áhættumats. Sýking hefur ekki greinst hér á landi.



Skilgreiningin á hættustigi er eftirfarandi: Umtalsverðar hópsýkingar brjótast út hjá mönnum en þær eru enn staðbundnar. Veiran aðlagast mönnum í vaxandi mæli og umtalsverð hætta er á heimsfaraldri. Sýking kann að hafa verið staðfest hér á landi en lýsa má hættustigi þó sýking hafi ekki borist til landsins. 



„Við munum breyta stiginu hjá okkur þegar tilfelli greinist á landinu. Við erum í rauninni þegar farin að vinna ýmis verkefni sem við ættum að vera að gera á hættustigi þannig að undirbúningurinn heldur áfram og við erum búin að lyfta undirbúningnum upp alveg bara með því sem við erum að gera en við höfum ekki séð ástæðu til að breyta opinberu skilgreiningunni enn sem komið er,“ segir Rögnvaldur í samtali við fréttastofu.

„Við erum ekki það barnaleg að halda að við munum sleppa við þetta“

Mögulega styttist þó í að veiran greinist hér og viðbúnaðarstig verði þá aukið.



„Eins og við höfum alltaf talað um að við erum ekki það barnaleg að halda að við munum sleppa við þetta þó það væri náttúrulega stór plús ef það myndi vera þannig. En allur okkur undirbúningur miðast við að þetta komi upp og þá bara hvernig við hægjum á þessu og drögum úr áhrifum sem mest við getum þannig að það séu sem fæstir veikir á hverjum tíma,“ segir Rögnvaldur.



Þá leggur hann áherslu að yfirvöld muni láta almenning vita um leið og vitað sé um staðfest smit enda sé mikilvægt að veita fólki réttar og góðar upplýsingar sem það geti treyst. Það auki öryggiskennd fólk og sé meðal annars ástæða þess að yfirvöld vilji halda reglulega upplýsingafundi vegna stöðu mála. Slíkur fundur var í fyrsta sinn haldinn í gær og annar fundur verður í dag.



Sjá einnig: Spurt og svarað um kórónuveiruna

Ekkert endilega stór, rauður fáni að veiran hafi greinst í Danmörku

Kórónuveiran hefur nú greinst í öllum löndum Skandinavíu eftir að smit voru staðfest í Noregi annars vegar og Danmörku hins vegar í gær og í dag.



Spurður hvaða þýðingu það hafi fyrir Ísland að smit hafi til dæmis greinst í Danmörku segir Rögnvaldur landafræðina kannski örlítið afstæða í þessu.



„En að sjálfsögðu ýtir það við okkur ef smit eru farin að greinast nær okkur í löndum, en staðan er bara þannig að fólk sem er hérna á Íslandi gæti hafa verið hinu megin á hnettinum fyrir hálfum sólarhring síðan. Þannig að það eitt og sér er kannski ekkert endilega stór, rauður fáni en að sjálfsögðu er þetta eitthvað sem við fylgjumst vel með og líka eins og ég talaði um að við finnum aukinn áhuga hjá almenningi og fjölmiðlum því þetta er farið að færast nær okkur,“ segir Rögnvaldur.

Reyna að kortleggja hversu margir eru í sóttkví

Sóttvarnalæknir beinir þeim tilmælum til fólks að ferðast ekki á þau svæði sem skilgreind hafa verið sem áhættusvæði, það er til Kína, fjögurra svæða á Norður-Ítalíu (Lombardía, Venetó, Emilia Rómanja og Píemonte), Suður-Kóreu og Írans.



Þá er mælst til þess, hafi fólk verið á þessum áhættusvæðum nýlega, að það fari í fjórtán daga sóttkví. Einnig er mælst til þess að þeir sem hafa dvalið á H10 Costa Adeje Palace-hótelinu á Tenerife á Spáni frá 17. febrúar síðastliðnum haldi sig heima í sóttkví í fjórtán daga.



Rögnvaldur segir ekki til nákvæmar upplýsingar um það hversu margir séu í sóttkví hér á landi en í dag á að reyna að kortleggja það betur.

 

„Það er eitt af því sem við ætlum að skoða í dag hvort það sé hægt að kortleggja það einhvern veginn því þetta eru tilmæli okkar og sóttvarnalæknis til fólks að það fari í sóttkví ef þessar skilgreiningar eiga við þau. Sumir hafa gert þetta þegjandi og hljóðalaust en aðrir hafa látið vita af sér þannig að við erum að skoða hvort við getum náð betur utan um þetta til að hafa þessa upplýsingar miðlægar.“