Menning

Sjávarmál rís við Eiðsgranda

Sylvía Hall skrifar
Frá athöfninni í dag. Andri Snær Magnason, rithöfundur og einn höfunda verksins, sýnir smærri útgáfu af verkinu sem mun rísa.
Frá athöfninni í dag. Andri Snær Magnason, rithöfundur og einn höfunda verksins, sýnir smærri útgáfu af verkinu sem mun rísa. Kristinn Guðmundsson

Listaverkið Sjávarmál bar sigur úr býtum í samkeppni um útilistaverk í Vesturbæ Reykjavíkur. Sjávarmál er hannað af arkitektunum Baldri Helga Snorrasyni og David Hugo Cabo í samstarfi við Andra Snæ Magnason rithöfund.

Þetta tilkynnti Dagur B. Eggertsson borgarstjóri í dag. Niðurstöðurnar voru kynnar nú um hádegisbil og fór athöfnin fram við Eiðsgranda þar sem áætlað er að verkið muni rísa en alls voru sjötíu tillögur sendar inn í keppnina.

Listasafn Reykjavíkur

Sjávarmál er tvískipt verk: Á þeirri hlið sem snýr að hafinu er steypt innbjúg skál sem safnar hljóðum hafsins og magnar þau upp með endurkasti fyrir þann sem stendur fyrir framan skálina. Á hinni hliðinni er hrjúfur veggur þar sem íslenskt heiti fyrir hafið eru letruð.

„Áhrif loftslagsbreytinga á hafið eru höfundum hugleikin og verkinu er ætlað að bjóða upp á tækifæri fyrir þá sem eiga leið hjá til að staldra við, upplifa krafta hafsins og hlusta eftir því náttúran hefur að segja okkur,“ segir í tilkynningu um verkið.

Í tilkynningu frá Listasafni Reykjavíkur segir að verkið muni auka notagildi og aðdráttarafl svæðisins, en ekkert útilistaverk er á svæðinu sem stendur. Samkeppni um útlistaverk var á meðal þess sem kosið var um í verkefninu Hverfið mitt 2020 og verður því nú hrint í framkvæmd.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.