Erlent

Hringur sem týndist í Bandaríkjunum fyrir 47 árum fannst í Finnlandi

Tryggvi Páll Tryggvason skrifar
Hringurinn fannst í skógi við finnska bæinn Kaarina, þar sem finna má þessar rústir.
Hringurinn fannst í skógi við finnska bæinn Kaarina, þar sem finna má þessar rústir. Vísir/Getty

Kona sem glataði sérstökum útskriftarhring í Maine-ríki Bandaríkjanna árið 1973 getur tekið gleði sína á ný. Hringurinn fannst nýverið í skógi í Finnlandi, um sex þúsund kílómetrum frá þeim stað þar sem hringurinn týndist.

Hin 63 ára gamla Debra McKenna var grunnskólanemandi þegar hún glataði hringnum í verslun í bænum Portland í Maine árið 1973. Hringurinn var upphaflega eign eiginmanns hennar sem gaf henni hringinn er þau voru kærustupar í skóla. Hjónin voru gift í 40 ár en eiginmaður Debru andaðist árið 2017.

Í frétt Guardian segir að Debra hafi að mestu verið búin að gleyma hringnum áður en hann skilaði sér til hennar í síðustu viku. Það var fundvís Finni sem fann hringinn undir 20 sentimetra moldarlagi í skógi í Finnlandi í grennd við Kaarina, fyrr á árinu. Var hann á ferð um skóginn með málmleitartæki.

Á hringnum var áletrað nafn skólans sem Debra og eiginmaður hennar gengu í. Þá voru upphafsstafirnir S M einnig áletraðir á hringinn. Finninn sem fann hringinn hafði samband við nemendafélag fyrrverandi nemenda skólans sem komust að því að hringurinn hafði verið í eigu eiginmanns Debru. Því var hægt að koma honum í réttar hendur eftir 47 ár.

Ferðalag hringsins frá Maine til Finnlands er þó enn óútskýrt og verður það líklega áfram.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.