Erlent

Trump teng­ir fjár­svelt­i pósts­ins við kosn­ing­arn­ar

Samúel Karl Ólason skrifar
Donald Trump, hefur ítrekað lýst yfir andstöðu sinni við póstatkvæði.
Donald Trump, hefur ítrekað lýst yfir andstöðu sinni við póstatkvæði. AP/Andrew Harnik

Donald Trump, forseti Bandaríkjanna, sagði í dag að hann væri mótfallinn auknu fjármagni til Póstsins þar í landi. Viðurkenndi hann að það væri svo stofnunin gæti ekki brugðist við auknu álagi vegna fyrirhugaðra póstatkvæðagreiðslna í forsetakosningunum í nóvember.

Demókratar hafa reynt að fá auknar fjárveitingar til Póstsins og í kosningainnviði inn í neyðarfrumvarp vegna faraldurs nýju kórónuveirunnar, sem hefur leikið Bandaríkin grátt. Það hefur þó lítið gengið og sagði Trump það vera vegna mótstöðu hans við að koma póstinum til aðstoðar.

Frumvarpi þessu er ætlað að koma efnahagslífinu og skólum, svo eitthvað sé nefnt, til aðstoðar vegna faraldursins.

Ekkert hefur þó gengið í viðræðum Demókrata og Repúblikana og hafa engar viðræður þeirra á milli átt sér stað í tæpa viku. Trump hefur nú viðurkennt að það sé vegna þess að hann vilji ekki að Pósturinn fái fjárveitingu.

Trump hélt því fram að Demókratar vildu að kosningarnar færu alfarið fram í gegnum Póstinn. Það er að segja að allir kjósendur fái senda kjörseðla í pósti, hvort sem þeir biðja um það eða ekki. Það er ekki rétt hjá Trump. Demókratar vilja þó gera fólki auðveldara að biðja um seðla í pósti og tryggja að þeir seðlar komist til skila.

„Ef við semjum ekki, þá fá þau ekki peningana. Það þýðir að þau fá ekki kosningarnar í gegnum Póstinn,“ sagði Trump í símaviðtali á Fox News í dag.

Trump hefur einnig haldið því fram að póstatkvæði leiði til umfangsmikils konsingasvindls, sem er heldur ekki rétt.

Í apríl sagði Trump að aukinn fjöldi póstatkvæða kæmi niður á Repúblikönum. Því þyrftu þeir að berjast gegn þeim af miklum krafti.

Sjá einnig: Hótar Nevada lögsókn vegna póstatkvæða

Háttsettir stjórnmálamenn í mörgum ríkjum Bandaríkjanna vinna nú hörðum höndum að því að gera kjósendum auðveldara að senda atkvæði sín í pósti til að reyna að sporna gegn útbreiðslu nýju kórónuveirunnar.

Heilt yfir hefur notkun póstatkvæða verið að aukast á undanförnum árum og hefur fjórðungur Bandaríkjamanna greitt atkvæði með þeim hætti í undanförnum þremur alríkiskosningum Bandaríkjanna.

Þá fara kosningar að mestu fram með póstatkvæðum í fimm ríkjum, Colorado, Hawaii, Oregon, Utah og Washington, og hafa gert um árabil.

Framboð Joe Biden, mótframbjóðanda Trump, segir forsetann markvisst vinna að því að gera fólki erfiðara að kjósa. Þannig hafi hann grafið undan nauðsynlegri þjónustu fyrir dreifbýl svæði.

Aðrir Demókratar hafa sömuleiðis sakað forsetann um að viðurkenna með berum orðum að hann ætli að reyna að koma í veg fyrir að Bandaríkjamenn geti kosið á öruggan hátt, vegna þess hve lítið fylgi hann hefur verið að fá í skoðanakönnunum.

Hér má sjá ummæli þingmannsins Hakeem Jeffries um orð Trump. Hann segir málið ljóst. Trump sé að rústa Póstinum til að stela kosningunum.

Nancy Pelosi, leiðtogi Demókrata á þingi, sagði markmið þeirra ekki eingöngu að verja rétt Bandaríkjamanna til að kjósa heldur einnig til að tryggja nauðsynlega þjónustu póstsins.

Í dag hafa svo borist fregnir af því að verið sé að fjarlægja vélar sem flokka póst úr pósthúsum landsins og án þess að yfirmenn Póstsins hafi gefið nokkrar skýringar á því. Trump skipaði Louis DeJoy sem yfirmann pósts Bandaríkjanna fyrir skömmu, en sá hefur veitt töluvert fé til forsetaframboðs Trump. DeJoy hefur skorið mikið niður hjá póstinum síðan og skipt út fjölmörgum yfirmönnum þar.

Á blaðamannafundi í kvöld ítrekaði Trump að ekki væri hægt að notast við póstatkvæði án frekari fjármagns til Póstsins. Hann hélt áfram að halda því fram að Demókratar vildu alfarið notast við póstatkvæði.


Tengdar fréttir

Kölluðu Trump „vælu­kjóa“

Joe Biden kom fram á blaðamannafundi í nótt með Kamölu Harris, varaforsetaefni sínu, í fyrsta sinn síðan hann tilkynnti um valið á Harris.

Við­ræður um stuðnings­að­gerðir skiluðu engu

Viðræður fulltrúa Repúblikana og Demókrata á Bandaríkjaþingi um stuðningsaðgerðir vegna áhrifa kórónuveirufaraldursins á bandarísk heimili og fyrirtæki sigldu í strand í nótt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×