Taugrímur geti verið betri en ekki neitt ef aðstæður leyfa ekki annað

Notkun taugríma til að verja sig og aðra fyrir kórónuveirunni kemur ekki í staðinn fyrir aðrar einstaklingsbundnar smitvarnir eins halda tveggja metra fjarlægð, handþvottur, almenn smitgát og forðast margmenni. Skortur er á rannsóknum á gagnsemi taugríma, en þær geta þó verið betri en ekki neitt, leyfi aðstæður ekki annað.

Þetta kemur fram á Vísindavefnum þar sem leitast er við að svara spurningunni hvort taugrímur dugi til að verjast Covid-19.

„Í stuttu máli vitum við að taugrímur virka ekki eins vel og skurðgrímur eða veirugrímur. Hins vegar geta þær verið betra en ekki neitt ef aðstæður leyfa ekki annað,“ segir á Vísindavefnum.

Þar kemur einnig fram að almennt ætti að forðast taugrímur úr teygjanlegu efni, sem getur verið með breytilega síunargetu og þoli illa þvott. Einföld blanda af bómull og silki virðist hafa síunargetu sem er ekki ýkja langt frá skurðgrímum, og gott sé að miða við að taugríman sé minnst þriggja eða fjögurra laga, svo virkni grímunnar sé hámörkuð.

Samantekið ættu eftirfarandi atriði að gilda um notkun taugríma að því er fram kemur á vísindavefnum.

• Aðeins nota þegar ekki er hægt að viðhalda tveggja metra reglunni.
• Aðeins nota þegar ekki er hægt að nálgast einnota skurðgrímur.
• Þær þurfa að vera að minnsta kosti þriggja laga, helst með einu lagi úr þéttri bómull (innsta lagið) og tvö lög úr öðru, þéttu efni (til dæmis pólýester).
• Engin samnýting á grímum - hver á sína grímu.
• Þvo daglega.
• Þvo hendur reglulega með sápu og vatni.Taugrímur á aldrei að nota í stað skurðgríma í hááhættuaðstæðum (til dæmis á spítölum eða hjúkrunarheimilum).
• Nota á réttan hátt, samanber reglurnar hér að neðan

Einnig er bent á almennar leiðbeiningar við notkun taugríma, sem gildi einnig um notkun á skurðgrímum.

• Hendur þurfa að vera hreinar áður en gríma er sett á.
• Gríman þarf að hylja nef og munn, og liggja þétt að andliti.
• Ekki má snerta sjálfa grímuna eftir að hún er komin á.
• Ekki ætti að taka grímuna niður nema næsti einstaklingur sé í minnst tveggja metra fjarlægð.
• Aðeins á að snerta böndin þegar gríma er tekin niður. Þvo skal hendur eftir að gríman hefur verið tekin niður.
• Taugrímur þarf að þvo daglega. Nákvæm aðferð fer eftir gerð grímu en í flestum tilfellum er hefðbundinn þvottur í þvottavél ásættanlegur.

Við aðstæður þar sem skylt er að nota andlitsgrímur líkt og skilgreint er í auglýsingu heilbrigðisráðherra um takmörkun á samkomum vegna Covid-19 er tekið fram að aðeins skal nota grímur sem uppfylla kröfur evrópsku staðlasamtakanna (CEN) og hefur sóttvarnalæknir jafnframt sett nánari leiðbeiningar þar að lútandi.