GDRN spilaði síðast þegar Þróttur vann leik í efstu deild

Tveir leikir fara fram í Pepsi Max-deild kvenna í kvöld og hefjast þeir báðir klukkan 19:15. Íslandsmeistarar Vals taka á móti Stjörnunni og nýliðar FH og Þróttar mætast í beinni útsendingu á Stöð 2 Sport.

FH hefur tapað öllum þremur leikjum sínum á meðan Þróttur er með eitt stig. Þróttarar bíða ekki bara eftir sínum fyrsta sigri í sumar heldur fyrsta sigrinum í efstu deild síðan 2013.

Síðasti sigur Þróttar í efstu deild kom á Valbjarnarvelli 8. ágúst 2013, eða fyrir 2525 dögum. Þróttur sigraði þá Aftureldingu 1-0. Eva Bergrín Ólafsdóttir skoraði eina mark leiksins á 48. mínútu.

Þegar sjö mínútur voru til leiksloka kom Guðrún Ýr Eyfjörð Jóhannesdóttir inn á í liði Aftureldingar. Hún er í dag betur þekkt sem tónlistarkonan GDRN.

Guðrún lék fimm leiki með Aftureldingu í efstu deild 2013 og tvo árið eftir. Hún sneri sér svo alfarið að tónlist með góðum árangri. Guðrún sendi frá sér plötuna Hvað ef 2018 og fylgdi henni eftir með GDRN sem kom út í ár.

Guðrún og stöllur hennar í Aftureldingu héldu sér uppi á markatölu sumarið 2013. Þróttur vann hins vegar aðeins þennan eina leik gegn Aftureldingu og féll með þrjú stig. Þróttarar léku aftur í efstu deild 2015 en mistókst þá að vinna leik og féllu með tvö stig.

Þrátt fyrir að vera enn án sigurs hefur Þróttur vakið athygli fyrir fína spilamennsku í upphafi tímabils. Liðið tapaði 4-3 fyrir ÍBV í Vestmannaeyjum í 1. umferðinni og laut svo í lægra haldi fyrir Íslandsmeisturum Vals, 1-2, í 2. umferðinni. Í þeirri þriðju gerði Þróttur svo 2-2 jafntefli við Fylki í hörkuleik í Árbænum.

Leikur FH og Þróttar hefst klukkan 19:15 í kvöld og verður sýndur í beinni útsendingu á Stöð 2 Sport. Þá verður hægt að fylgjast með leiknum í beinni textalýsingu á Vísi.