„Teygðum okkur eins langt og við töldum mögulegt“

„Við teygðum okkur eins langt og við töldum mögulegt, og jafnvel aðeins lengra,“ segir Guðni Bergsson um 120 milljóna króna fyrirgreiðslu KSÍ til aðildarfélaga.

Fjárhagskrísa knattspyrnufélaga landsins varð til þess að stjórn KSÍ samþykkti að veita 100 milljónum króna af eigin fé til aðildarfélaga og fá þau félög sem mest hlutu tæplega 5,7 milljónir í sinn hlut. Áður hafði verið samþykkt að fella niður þátttökugjöld og ferðajöfnunargjöld vegna komandi keppnistímabils, samtals um 20 milljónir króna.

„Ég held að það hafi verið almenn sátt um þessar aðgerðir. Við höfum farið vel yfir og greint ástandið í samvinnu við Deloitte, bæði hjá félögunum sjálfum og svo auðvitað varðandi fjárhag KSÍ. Það er að mörgu að huga en við gerðum það að markmiði að reyna að gera eins vel og hægt er í stöðunni fyrir aðildarfélögin, en með ábyrgum hætti,“ sagði Guðni við Vísi.

„Algjörlega óábyrgt“ að fara að ráðum Geirs

Ljóst er að sum félög eru enn illa stödd, þrátt fyrir þessa aðstoð og fyrri aðgerðir KSÍ sem fólust í fyrirframgreiðslum til aðildarfélaga. Forveri Guðna í starfi, Geir Þorsteinsson sem nú er framkvæmdastjóri ÍA, kallaði í pistli á Facebook eftir mun meiri fjárstuðningi við aðildarfélög KSÍ:

„Ég verð að segja það að það væri algjörlega óábyrgt á þessum tímapunkti. Við teygðum okkur eins langt og við töldum mögulegt, og jafnvel aðeins lengra, til að reyna að styðja við aðildarfélögin eins og okkar hlutverk og skylda er. Við höfum tæplega 350 milljónir til að spila úr, í handbæru eigin fé, og í vissum sviðsmyndum gætum við mögulega séð fram á tekjutap upp á 100-200 milljónir. Við verðum því auðvitað að fara varlega og ég held að það sé vilji aðildarfélaganna að KSÍ passi upp á sinn fjárhag og sé með trausta eiginfjárstöðu. Enda var á þeim fundum sem við höfum átt mikil sátt með þessa útfærslu, að þarna væri gengið eins langt og við mættum mögulega ganga,“ sagði Guðni. 

En telur hann þá nóg að gert fyrir félögin með þessum nýjustu aðgerðum?

„Þetta er fyrirgreiðsla upp á 120 milljónir og hún hjálpar að sjálfsögðu til í þessum örðugleikum sem aðildarfélögin eiga við. Við höfum svo auðvitað verið í hagsmunagæslu gagnvart stjórnvöldum, sem hafa greitt í sjóð sem ÍSÍ er í forsvari fyrir og auðvitað fer hluti af honum til knattspyrnunnar. Svo er vonast til að sveitarfélögin komi að þessu líka og ég býst við og vonast eftir frekari framlögum til íþróttahreyfingarinnar því að það er virkilega þörf á því,“ segir Guðni, og bætir við:

„Þetta hjálpar allt til og ég veit að aðildarfélögin eru öll að gera sitt besta til að vinna sig út úr þessari stöðu. Það má ekki gleyma samningunum við starfsfólk, þjálfara og leikmenn sem að hafa líka lagt sín lóð á vogarskálarnar með lækkun launa.“

Ótímabært að velta fyrir sér EM-peningum

Fjárhagsáætlun KSÍ gerir ekki ráð fyrir því að íslenska karlalandsliðið tryggi sér sæti á EM á næsta ári en takist það, hvenær svo sem að umspilið verður klárað, er ljóst að af því myndu hljótast miklar tekjur sem aðildarfélögin myndu eflaust njóta góðs af. Guðni segir reyndar ekki tímabært að velta vöngum yfir þessum málum.

„Þótt að við séum bjartsýn og ætlum okkur á EM þá vitum við að það er bara eitt lið úr fjögurra liða umspili sem kemst þangað. Þó að við séum bjartsýn gengur ekki að gera ráð fyrir því í fjárhagsáætlunum að við komumst á EM. Vonandi verður það seinni tíma úrlausnarefni hvernig við nýtum okkur það.“