Innlent

Vill að sótt­varna­læknir stýri skimunar­verk­efninu á Kefla­víkur­flug­velli

Kolbeinn Tumi Daðason skrifar
Kári Stefánsson í Turninum í Kópavogi þar sem mörg þúsund manns hafa farið í skimun fyrir kórónaveirunni hjá Íslenskri erfðagreiningu.
Kári Stefánsson í Turninum í Kópavogi þar sem mörg þúsund manns hafa farið í skimun fyrir kórónaveirunni hjá Íslenskri erfðagreiningu. Vísir/Vilhelm

Kári Stefánsson, forstjóri Íslenskrar erfðagreiningar, segir að bæta þurfi samskipti við heilbrigðisráðuneytið. Hann telur eðlilegt að sóttvarnalæknir hafi yfirumsjón með verkefninu skimunum á Keflavíkurflugvelli. Hann eigi í engri baráttu við sýkla- og veirufræðideild Landspítalans.

Aðalumræðuefni fundar í Stjórnarráðinu í morgun var að sögn Kára hvernig best væri að standa að skimun á Keflavíkurflugvelli. Auk forsætisráðherra sat sóttvarnalæknir fundinn.

Kári Stefánsson gengur út af fundi með forsætisráðherra og sóttvarnalækni í Stjórnarráðinu í morgun.Vísir/Vilhelm

Til fundarins í morgun hafði verið boðað áður en Kári lét gamminn geysa í Kastljósviðtali í gær. Þar mátti merkja að hann væri ósáttur við framkomu heilbrigðisráðherra sem hefði annars vegar ekki minnst á hlutverk Íslenskrar erfðagreiningar í kórónuveirufaraldrinum í þakkarræðu sinni á síðasta upplýsingafundinum.

Hins vegar hefði ekkert verið rætt við Íslenska erfðagreiningu um aðkomu að skimun ferðamanna á Keflavíkurflugvelli. Hann hefði fyrst heyrt að ráðherra gerði ráð fyrir aðkomu fyrirtækisins þegar hún minntist á það í framhjáhlaupi í Kastljósviðtali á þriðjudag.

Engin smáatriði til umræðu

„Við vorum þarna við þrjú, Katrín, Þórólfur og ég. Við vorum að ræða hvernig best væri að standa að því að skima úti á flugvelli. Við fórum ekki í nein smáatriði heldur ræddum þetta svona almennt,“ segir Kári og lætur vel yfir samræðunum.

Ríksistjórnarfundur og blaðamannafundur vegna samkomubannsFoto: Vilhelm Gunnarsson/Vilhelm Gunnarsson

Líklegt sé að Íslensk erfðagreining komi að verkefninu, í það minnsta sem ráðgjafar. Í viðtalinu í Kastljósi í gær útilokaði Kári aðkomu fyrirtækisins að skimunum og sagði heilbrigðisráðherra hegða sér á tíðum eins og tíu ára hrokafull stelpa.

„Það er búið að flytja þetta verkefni undir forsætisráðuneytið. Þess utan finnum við út einhverja leið til að bæta samskiptin við heilbrigðisráðuneytið,“ segir Kári.

Bæta samskiptin

„Ég held að bæði ráðuneytið og við séum á þeim stað að við viljum sjá til þess að við getum unnið þannig á þann hátt að það verði samfélaginu hollt. Og ég hugsa að það takist,“ segir Kári.

Í skýrslu verkefnastjórar um sýnatöku vegna kórónuveirunnar á landamærum Íslands kemur framað sýkla- og veirufræðideild Landspítalans sé ekki í stakk búin til að taka sýni úr nema 500 farþegum sem koma til landsins á degi hverjum. Til þess að auka afkastagetu þarf að bæta tækjabúnað, mönnun og aðstöðu deildarinnar.

Skimanir á Keflavíkurflugvelli eiga að hefjast 15. júní. Margt er ófrágengið áður en til þess getur komið.Vísir/Vilhelm

Miðað við fyrirliggjandi áætlanir er í fyrsta lagi hægt að auka afkastagetu í 1000 sýni á dag eftir miðjan júlí. Kostnaðurinn við hvert sýni, séu tekin 500 sýni á dag, er tæplega 23 þúsund.

Verkefnastjórnin fékk 10 daga til að vega og meta boðaða opnun Íslands fyrir ferðamönnum sem á að eiga sér stað fyrir 15. júní. Ekkert var minnst beint á Íslenska erfðagreiningu í skýrslunni en orðað sem svo að aðstoðar væri þurfi frá utanaðkomandi aðilum enda geta veirufræðideildarinnar takmörkuð.

Engin barátta við veirufræðideildina

Kári segir af og frá að einhver stöðubarátta sé á milli veirufræðideildarinnar og Íslenskrar erfðagreiningar.

„Það er engin stöðubarátta komin þar upp. Veirufræðideildin uppi á Landspítala er illa í stakk búin, hefur verið svellt fjárhagslega og ekki fengið fjármagn til að kaupa tæki og ráða mannskap,“ segir Kári.

Veirufræðideildin á Landspítalanum í Fossvogi.Þorkell Þorkelsson

Þar starfi afskaplega gott fólk sem hann beri virðingu fyrir og Íslensk erfðagreining vilji vinna náið með.

„Veirufræðideildin er ekki á þeim stað að hún sé spennandi andstæðingur að berjast við. Kannski verður hún það seinna og þá förum við kannski í stríð við hana. En ekki eins og stendur,“ segir Kári á léttum nótum.

Fullyrðing um lokun á símanúmer Þórólfs algjört grín

Kári furðar sig á því að einhverjir telji að honum hafi verið alvara þegar hann sagðist í Kastljósi hafa lokað á símanúmer sóttvarnalæknis. Hrósaði hann Þórólfi í hástert í þættinum í gær og sagði sjarma hans í raun svo mikinn að hann ætti erfitt með að neita beiðni frá honum. Því hefði hann lokað á símanúmer Þórólfs.

Fjölmörgum fréttum hefur verið slegið upp um málið og hefur Bjarni Benediktsson fjármálaráðherra meðal annars sagt á Alþingi að það eina sem standi í vegi fyrir aðkomu Íslenskrar erfðagreiningu að skimunum sé stilling í síma Kára.

Kári lýsir Þórólfi sem skemmtilegum, sjarmerandi og hlýjum. Manni sem erfitt sé að segja nei við.Vísir/Vilhelm

Nú, eftir fund Kára með forsætisráðherra og sóttvarnalækni, virðist Íslensk erfðagreining ætla að koma að skimunum.

„Ef það er einhver þarna úti sem tók það bókstaflega, eigum við ekki bara að leyfa þeim að gera það? Ég hélt að það væri gjörsamlega ljóst að spyrillinn og ég fórum að gantast,“ segir Kári. Orð Einars Þorsteinssonar, spyrils í Kastljósi, þess efnis að Kári væri ruglaður hefðu svo sannarlega ekki farið fyrir brjóstið á Kára. Þvert á móti. Þeir hafi verið komnir á svefngalsastig í tali sínu.

Einar hefur beðist afsökunar á orðavali sínu á Facebook.


Tengdar fréttir

Kári Stefánsson mættur í Stjórnarráðið

Kári Stefánsson, forstjóri Íslenskrar erfðagreiningar, er mættur til fundar í stjórnarráðið þar sem forsætisráðuneytið er meðal annars með skrifstofur sínar. Kári mætti í leigubíl rétt upp úr klukkan ellefu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.