Gylfi og félagar í Everton komnir í sóttkví

Gylfi Þór Sigurðsson og samherjar hans í Everton eru komnir í sóttkví að læknisráði.

Ákvörðunin var tekin eftir að leikmaður í aðalliði Everton sýndi merki þess að vera með kórónuveiruna.

Allir leikmenn í aðalliði Everton eru því farnir í sóttkví og sömu sögu er að segja af þjálfarateyminu.

Í yfirlýsingu frá Everton kemur fram að heilsa og öryggi leikmanna og starfsfólks félagsins sé í fyrsta sæti og því hafi þessi ákvörðun verið tekin. Þá hefur heimavelli liðsins og æfingasvæði verið lokað.

Everton á að mæta Liverpool í ensku úrvalsdeildinni á mánudagskvöldið en ljóst er að ekkert verður af þeim leik.