Arnþrúður segir sig og Útvarp Sögu á dauðalista Djúpríkisins

Arnþrúður Karlsdóttir útvarpsstjóri gefur ekkert fyrir dóm sem hún hlaut í gær vegna meiðyrða í garð Reynis Traustasonar blaðamanns. Hún segir þau orð standa. Algerlega. Í sínum huga. Það sem meira er; hún telur dómarann hafa lagt sér orð í munn. Hún ætlar að áfrýja málinu til Landsréttar, eins og fram kom í tilkynningu lögmanns hennar, Vilhjálmi H. Vilhjálmssyni og ef Landsréttur staðfestir dóminn þá er henni nauðugur sá kostur að fara með málið til Evrópu, fyrir Mannréttindadómstólinn þar.

Vísir gerði ítrekaðar tilraunir til að ná í Arnþrúði Karlsdóttur útvarpsstjóra í gær með það fyrir augum að fá viðbrögð hennar við dómi sem féll í héraði í gær í máli Reynis Traustasonar blaðamanns á hendur henni. Tvenn ummæli hennar voru dæmd dauð og ómerk og var henni gert að greiða Reyni 300 þúsund í málsvarnarlaun og málskostnað sem nemur 1,1 milljón króna.

En, það kom ekki að sök þó ekki tækist að ná tali af útvarpsstjóranum. Arnþrúður gerði, ásamt Pétri Gunnlaugssyni helsta útvarpsmanni Útvarps Sögu, málið að sérstöku umtalsefni á öldum ljósvakans í gær. Hún sagðist standa við orð sín, hún hafi ítrekað sjálf orðið fyrir lygaskrifum, bæði um sig og sína persónu sem og Útvarp Saga af hálfu Reynis, þegar hann var ritstjóri DV. Þar hafi birst misvísandi fyrirsagnir sem svo ærðu óstöðuga í athugasemdakerfi og þar fengi hún að ósekju yfir sig holskeflu óhróðurs. Arnþrúður sagist ekki hafa það að venju að fjalla um sig og sín mál á Útvarpi Sögu en hún ætlaði að gera undantekningu og að hún áskildi sér fullan rétt til þess að hafa uppi varnir í málinu.

Hefnd vegna vasklegrar framgöngu í Icesavemálinu

Dómnum ætlar Arnþrúður að áfrýja. Hún sagði jafnframt að dómarinn hafi lagt sér orð í munn. Hún hafi ekki sagt að Reynir væri morðingi heldur hafi hann lagt líf fólks í rúst. Það væri ekki það sama.

Í sjálfu sér kom niðurstaðan þeim Arnþrúði og Pétri ekki á óvart. Þau hafi unnið sér það til óyndis innan kerfisins að hafa barist hart í Icesave-málinu. „Svona virkar kerfið. Þetta tengist Icesave,“ segir Arnþrúður sem fór yfir það að þau hafi safnað þúsundum undirskrifta fyrir forsetann. Útvarpi Sögu hafi verið kennt um hvernig fór með það mál.

„Ég fékk það staðfest hjá fyrrum ráðherra, við vorum á dauðalista sem þá var notaður á fyrirtæki. Sem kostaði okkur 7 milljónir. Sem leiddi til þess að við fórum í þrot,“ sögðu þau Pétur og Arnþrúður sem sögðu að þeim væri hegnt fyrir að varpa ljósi á það sem væri að gerast. „Alltaf erfiðast að lesa í atburði líðandi stundar. Við erum hötuð af sumum að hafa þessar upplýsingar. Við tölum um Djúpríkið, krumlurnar eru á bak við tjöldin. Alls staðar með sína menn í kerfinu.“

Á dauðalista Djúpríkisins

Þetta hefði svo smitáhrif. Ef fólk á þessum dauðalista væri til umfjöllunar fyrir dómsstólum, þá væri hann dæmdur.

„Ítrekað. Ef nafn mitt hefur komið þar upp, þá skal þar bara dæmt og dæmt og dæmt. Sama hvaða sönnunargögn ég legg fram,“ sagði Arnþrúður. Þetta snérist um trúverðugleika vitnis sem væri alltaf matsatriði. „Ef viðkomandi vitni og vitnisburður kemur frá þeim sem telst vera óvinur ríkisins þarf dómari ekki að taka það gilt. og það er vandamálið fyrir íslenskum rétti í dag, geðþóttaákvörðun hver fer inn á lista yfir óvini djúpríkisins og nýt ekki réttarverndar fyrir íslenskum dómsstólum.“

Þetta er lykilatriði að mati þeirra Arnþrúðar og Péturs. Það væri bullandi og djúpstæð spilling á Íslandi. Þau eru ekkert alltof bjartsýn á að hljóta réttláta málsmeðferð í Landsrétti og ef þar fer sem þau grunar þá muni málið fara fyrir Mannréttindadómsstól Evrópu.

Pétur og Arnþrúður sögðu þetta snúast um tjáningarfrelsið og ef tekst að þrengja að því sé tómt mál að tala um önnur mannréttindi. „Ef við höfum ekki tjáningarfrelsi til að afhjúpa spillingu þá bara vex spillingin.“

Nokkur dæmi um ofsóknir gegn Útvarpi Sögu

Arnþrúður og Pétur nefndu nokkur dæmi um ofsóknir sem þau telja sig hafa mátt þola. Eins og þegar haturslögreglan rak mál á hendur Pétri. „Til skammar fyrir alla sem að því komu,“ sagði Arnþrúður en þar hafi verið lagt upp með að eyðileggja mannorð Péturs og þrengja að Útvarpi Sögu fjárhagslega. Eigna og ærumissir.

„Og dómur sem gekk gegn mér í fyrra,“ segir Arnþrúður um mál þar sem kona fór í mál við Útvarp Sögu vegna láns sem hún sagðist hafa veitt Arnþrúði en Arnþrúður sagði að allir á Útvarpi Sögu vissu að hún væri styrktaraðili stöðvarinnar.

„Í því máli reyndi hún að múta mér. Fá mig til að fjalla um ákveðinn einstakling hér í þjóðfélaginu, vildi að við myndum ráðast á hann. Nei vinkona, hún var styrktaraðili stöðvarinnar, þegar hún heyrir að við viljum ekki fara í níðumfjöllun um mann úti í bæ segir hún skyndilega að þetta hafi verið lán. Það var ekki tekið til greina í héraði og Landsrétti.“ Og var Arnþrúður dæmd til að greiða konunni 3,3 milljónir króna.

Og enn eitt dæmi tóku þau til sem er mál sem Sigurður G. Tómasson fyrrverandi útvarpsmaður og einn stofnanda Útvarps Sögu fór í við Arnþrúði, sem tók við Útvarpi Sögu af honum, Ingva Hrafni Jónssyni og Hallgrími Thorsteinssyni. En hann krafðist ógreiddra launa. Og hafði hann sigur fyrir dómsstólum í því máli.

„Sagði að sér hafi verið sagt upp með sms. Fór með þetta í blöðin. En, svo var hann búinn að týna símanum og þurfti ekki að sanna neitt.“

Ætla að stofna stjórnmálaflokk til að berjast gegn Djúpríkinu

Allt þetta og meira til hafa þau Arnþrúður og Pétur til marks um að að þeim sé sótt af hálfu Djúpríkisins. En þau ætla ekki að gefast upp.

„Við þessi stöð berjumst áfram með okkar hlustendur sem hafa hjálpað okkur gríðarlega. Fleiri en menn halda. En ef Djúpríkið ætlar að hafa sig svona í frammi þurfum við að huga að því að stofna stjórnmálaflokk, breiðfylkingu, sem berst gegn þessu skrímsli sem djúpríkið er. Kemur ekki til greina annað en stoppa þessa baktjaldaspillingu sem hér er.“

Ekki var annað á þeim að heyra en þeim Arnþrúði og Pétri sé full alvara með að stofna nýja stjórnmálahreyfingu sem hefur það á stefnuskrá að berjast gegn spillingu og Djúpríkinu. „Hingað og ekki lengra.“