Innlent

Sigurður G. fékk 2,4 milljónir frá Arnþrúði

Jakob Bjarnar skrifar
Sigurður G. fékk sitt borgað í topp áður en gamla félagið fór í þrot, og Útvarp Saga er ekki gjaldþrota, að sögn Arnþrúðar.
Sigurður G. fékk sitt borgað í topp áður en gamla félagið fór í þrot, og Útvarp Saga er ekki gjaldþrota, að sögn Arnþrúðar.
Arnþrúður Karlsdóttir útvarpsstjóri á Útvarpi Sögu segir fráleitt að rekstur hennar hafi verið keyrður í þrot til að komast hjá því að borga Sigurði G. Tómassyni útvarpsmanni, en Sigurður fór í mál við Útvarp Sögu vegna vangoldinna launa, mál sem hann vann.

Kjarninn greinir frá því að Útvarp Saga sé gjaldþrota. Arnþrúður segir þetta þvælu. „Verði nú bara Kjarnanum að góðu. Útvarp Saga er ekkert gjaldþrota. Reksturinn var seldur fyrir ári síðan. Kjarninn er að tala um gamalt félag sem er ekki einu sinni Útvarp Saga.

Vísar frétt Kjarnans til föðurhúsanna

Arnþrúður útskýrir að Fjölmiðlanefndin hafi innkallað öll útvarpsleyfi um áramót, fyrir ári, vegna nýrra fjölmiðlalaga. „Þá stóðum við frammi fyrir þeirri ákvörðun hvort við færum áfram að óbreyttu eða hvort við ætluðum að breyta þessu og opna fyrir nýja möguleika. Og það varð. Einhver fyrirsögn Kjarnans um að Útvarp saga sé gjaldþrota, verður bara að fara aftur til þeirra heimahúsa,“ segir Arnþrúður.

Málið er sem sagt þetta að félagið sem átti Útvarp Sögu, sem var í eigu Arnþrúðar, var selt öðru félagi, sem er í eigu Arnþrúðar. Í frétt Kjarnans er vitnað í Séð & heyrt þar sem haft eftir Arnþrúði að hún hyggist ekki una niðurstöðu Hæstaréttar í málinu sem Sigurður höfðaði og útvarpsstöðin stefni í gjaldþrot vegna þess. Arnþrúður gefur minna en ekkert fyrir þetta. „Þetta kemur ekkert Útvarp Sögu við, þetta er gamla félagið. Sigurður G. Tómasson fékk allt borgað, rúmar 2,4 milljónir. Frá gamla félaginu. Hann sótti að gamla félaginu, hann sótti gamla félagið og fékk allt borgað uppí topp. Þeir eru að reyna að búa til úlfalda uppúr einhverri mykju sem ég ekki átta mig á hver er.“

Borgaði Sigurði ekki með glöðu geði

Aðspurð segir Arnþrúður það hafa verið einhverjar fáeinar miljónir sem útaf stóðu í gamla félaginu, hún man það ekki. En, Sigurður G. fékk sannarlega sitt.

„Ef ég hefði viljað vera nastí hefði ég ekki borgað neitt og farið í þrot með þetta, það gerði ég engan veginn,“ segir Arnþrúður. Það breytir ekki þeirri skoðun hennar að mál Sigurðar á hendur sér sé hið mesta hneyksli og dómsstólum til skammar. Sigurður hafi horfið í fjóra mánuði, boðað komu sína með engum fyrirvara og hún hafi sent honum SMS þar sem segir að það sé nú frekar seint, Sigurður tekið því sem uppsögn og stefnt henni löngu síðar vegna vangoldinna launa. „Hann þurfti aldrei að sýna þetta sms svo mikið sem. Þetta eru ekki vangoldin laun, heldur uppsagnafrestur sem honum var dæmdur, þrátt fyrir þetta, og hann aldrei vann. Svo var hann meira að segja á launum hjá Ingva Hrafni Jónssyni á ÍNN á þessum sama tíma.“

Dyggir hlustendur þurfa engu að kvíða

En, svo kafla Sigurðar G. sé lokað, en ekki náðist í hann við vinnslu þessarar fréttar, þá segir Arnþrúður að dyggir hlustendur og aðdáendur Útvarps Sögu geti haldið áfram að hlusta eins og þeir eru vanir. „Gamla félagið fór í þrot 10. desember og gefur auga leið að við hefðum lokað stöðinni hún hefði fylgt þeim rekstri. Svo er ekki. Hér er tóm gleði og bongó-blíða. Við erum náttúrlega í þessari samkeppni sem er gríðarlega hörð. Yfirvöld vita af því að þessi samkeppni er ekki sanngjörn, en halda áfram að moka inní ríkisútvarpið fé til að kítta uppí öll göt.“

Arnþrúður sagði jafnframt, aðspurð, að það væri engin mafía eða útrásarvíkingar á bak við sig í þessum útvarpsrekstri.


Tengdar fréttir

Sigurður G. hafði betur gegn Útvarpi sögu í Hæstarétti

Útvarp saga þarf að greiða fjölmiðlamanninum Sigurði G. Tómassyni um 750 þúsund krónur í vangoldin laun. Þetta er niðurstaða Hæstaréttar sem kvað upp dóm sinn í máli sem hann höfðaði gegn útvarpsstöðinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.