Fyrst og fremst heiður

Ég lít ekki á titilinn sem pressu en hann gefur mér örugglega aðeins meira svigrúm til að vinna að ritstörfunum en annars hefði orðið. En fyrst og fremst er þetta heiður,“ segir Orri Harðarson, tónlistarmaður og rithöfundur sem er nýkjörinn bæjarlistamaður Akureyrar 2017 til 2018.

Orri á að baki langan feril sem tónlistar- og hljóðversmaður. Eftir hann liggja fimm sólóplötur en þar sem plötuútgáfa hefur breyst síðustu ár hefur hann aðallega sett fókusinn á ritlistina. Hann hefur gefið út þrjár bækur, Alkasamfélagið 2008 og skáldsögurnar Stundarfró 2014 og Endurfundi 2016.

Hann kveðst vera með tvær skáldsögur í kollinum og telur líklegt að önnur þeirra mótist að verulegu leyti á þessu ári, en lofar þó ekki að hún líti dagsins ljós fyrr en eftir tvö ár eða svo.

„Tónlistin hefur líka alltaf fylgt mér frá því ég kom fyrst fram ellefu ára og ég fæst enn við að semja lög,“ segir Orri sem hefur búið á Akureyri um þriðjunginn af 45 ára ævi. „Konan mín er fædd hér og börnin okkar líka, svo ég fer að líta á mig sem rótgróinn Akureyring,“ segir hann.

Fleiri viðurkenningar voru veittar á Akureyri á sumardaginn fyrsta.

Kristinn Björnsson og Edda Friðgeirsdóttir hlutu eina úr Hús­vernd­ar­sjóði fyrir viðgerðir og endurbætur á Aðalstræti 32, einu þeirra húsa sem prýða Innbæinn á Akureyri.

Fanney Hauksdóttir arkitekt fékk bygg­ingarlistar­verðlaun fyrir hjúkrunarheimilið Lögmannshlíð sem þykir afar vel happnað.

Svo hlaut handverkskonan Jenný Karlsdóttir heiður­sviður­kenn­ingu Menn­ing­ar­sjóðs og Akureyrarstofu fyrir að varðveita og upphefja íslenska menningararfinn, meðal annars með því að varðveita munstur sem sjá má á heimasíðunni munstur.is.

Menningarfélag Akureyrar ætlar að bjóða bæjarlistamanni ár hvert að nýta sér Menningarhúsið Hof eða Samkomuhúsið sem vettvang fyrir sýningu eða annars konar uppákomu í lok starfsársins.