Keirrison ekki á leið til Liverpool

Forráðamenn brasilíska liðsins Palmeiras segja að sóknarmaðurinn Keirrison sé ekki á leið til Liverpool í sumar eins og vangaveltur hafa verið um.

Keirrison er tvítugur og þykir einn efnilegasti leikmaður Suður-Ameríku um þessar mundir. Hann var markahæsti leikmaður brasilísku úrvalsdeildarinnar á síðasta tímabili en þá lék hann með Coritiba.

Hann hefur strax slegið í gegn hjá Palmeiras þar sem hann hefur skorað átta mörk í sex leikjum.

Toninho Cecilio, yfirmaður knattspyrnumála hjá félaginu, segir Keirrison ekki á leiðinni til Englands.

„Ég vil ekki eyða miklum tíma í þetta Liverpool-mál þar sem það er ekki satt. Við eigum í góðum sambandi við Liverpool sem keypti af okkur áður markvörðinn Diego Cavalieri og ef það væri eitthvað rétt í þessum fregnum hefðum við frétt fyrstir manna af því."

„Það er stefna stjórnarinnar að halda leikmanninum eins lengi og mögulegt er áður en hann heldur til Evrópu."