Hyggjast skima alla borgar­búa í Wu­han

Borgaryfirvöld í Wuhan, þar sem kórónuveiran var fyrst staðfest, ætla að ráðast í gríðarlega umfangsmikla rannsókn á útbreiðslu veirunnar þar í borg.

Til stendur að skima hvern einasta borgarbúa fyrir veirunni, en í Wuhan búa ellefu milljónir manna. Átakið á að standa í tíu daga en ekki hefur verið gefið út hvenær ráðast á í framkvæmdina.

Sex ný tilfelli kórónuveirunnar greindust í borginni um helgina en áður hafði veiran ekkert látið á sér kræla frá því í byrjun aprílmánaðar.

Wuhan var nær algjörlega lokað í ellefu vikur en byrjað var að slaka á takmörkunum þar strax 8. apríl.