Óttast að missa tökin á öldungadeildinni

Repúblikanar óttast að missa meirihluta þeirra í öldungadeild Bandaríkjaþings í kosningunum í nóvember. Kannanir sýna að Demókrötum hefur vaxið ásmegin og viðbrögð Donald Trump, forseta, vegna heimsfaraldurs nýju kórónuveirunnar hafa verið harðlega gagnrýnd.

Eins og staðan er núna eru Repúblikanar í meirihluta með 53 öldungadeildarþingmenn og Demókratar með 47.

Til að ná meirihluta þurfa Demókratar því að velta fjórum þingmönnum Repúblikanaflokksins úr sessi, eða þremur, ef Trump tapar baráttunni um Hvíta húsið og næsti varaforseti verður Demókrati. Varaforseti Bandaríkjanna á úrslitatkvæði ef atkvæðagreiðsla endar í jafntefli, ef svo má að orði komast.

Frambjóðendur Demókrataflokksins hafa safnað mun meiri peningum það sem af er af þessu ári en frambjóðendur Repúblikanaflokksins og þykir það til marks um meiri góðvild í garð flokksins.

Þó forsetinn sé kannski óvinsæll á landsvísu um þessar mundir, þykir ljóst að það borgar sig ekki fyrir frambjóðendur að tala gegn honum. Trump er enn gífurlega áhrifamikill þegar kemur að kjósendum Repúblikanaflokksins og þeir sem tala gegn Trump tekst ekki að sigra prófkjör og missa jafnvel stuðning flokksins.

Til marks um það sagði Politico frá því nýverið að þingmenn flokksins hafi fengið minnisblað þar sem þeim var ráðlagt að hætta að verja Trump, varðandi viðbrögð hans við veirunni, og þess í stað einbeita sér að því að kenna Kínverjum um faraldurinn.

Repúblikanar á þingi ítrekuðu fljótt eftir að fréttin var birt að þeir stæðu þétt við bakið á Trump.

Telja að ástandið verði betra í nóvember

Einn viðmælandi Washington Post innan Repúblikanaflokksins segir stöðuna ekki góða. Öll umræðan snúist að Trump og það sé slæmur staður fyrir Repúblikana að vera á. Hins vegar muni það ekki vara að eilífu.

Repúblikanar eru nefnilega bjartsýnir á að staða þeirra muni skána til muna þegar Bandaríkin, og heimurinn, færast aftur í fyrra horf og efnahagurinn tekur kipp, eins og þeir búast við á næstu sex mánuðum.

Það er þó alfarið óljóst hvert framhaldið verður.

Nú eru minnst 79.528 dánir í vegna Covid-19 í Bandaríkjunum og er talið að þeim muni fjölga talsvert á næstu vikum og mánuðum. Þá stendur til að slaka á viðmiðum varðandi félagsforðun og takmörkunum víða og er óttast að þannig muni smitum fjölga hraðar.

Kosið um 35 sæti

Kosið verður um 35 öldungadeildarsæti í nóvember og eru Repúblikanar að verjast í 23 þeirra.

Susan Collins í Maine og Thom Thillis í Norður-Karólínu eru í hvað verstri stöðu og þar að auki telja sérfræðingar Repúblikanaflokksins nánast öruggt að Cory Gardner muni tapap sæti sínu í Colorado.

Demókratar hafa þar að auki beint sjónum sínum að Arizona en Demókratar munu án efa tapa minnst einu sæti. Það er sæti Doug Jones í Alabama.

Demókrötum hefur einnig vaxið ásmegin í Montana þar sem frambjóðandi flokksins hefur verið að saxa á fylgi Steve Daines, þingmanns Repúblikanaflokksins.