Stefanía og stimpilgjöldin

Umræðan

Stimpilgjöld

Stefanía Sigurðardóttir háskólanemi skrifar mér opið bréf í Fréttablaðinu í gær um íbúðarkaup og afnám stimpilgjalda. Ég vil nota það tækifæri sem svar til hennar gefur til að undirstrika stefnumið ríkisstjórnarinnar í þessum mikilvægu málum, ekki síst þar sem bréf hennar var bæði málefnalegt og vel lagt upp í alla staði. Þakka ég henni bréfið enda málefnið einkar brýnt nú.

Stefanía spyr hvort stjórnvöld hyggist fella niður eða afnema stimpilgjöld á kaupsamninga og húsnæðislán. Þetta séu ósanngjarnir skattar og gjöld sem bitni illa á ungu fólki sem ræðst í það mikla verkefni að kaupa sér húsnæði.

Svarið við því er já og undir þessa skoðun Stefaníu tek ég heils hugar. Á dögunum kynnti viðskiptaráðuneytið stefnumörkun og nýja sókn í neytendamálum. Þar var efst á blaði yfir brýnustu verkefni í nánustu framtíð að afnema stimpilgjöld. Afnám þeirra er boðað í stefnuyfirlýsingu ríkisstjórnarinnar enda eitt af okkar stærstu baráttumálum síðastliðin misseri.

Stimpilgjöld eru ósanngjörn og dragbítur á eðlileg viðskipti. Skattur sem bitnar á þeim sem síst skyldi; ungu fólki sem er að kaupa sér fasteign. Því verða þau afnumin á kjörtímabilinu. Vonandi sem allra fyrst. Í ljósi þess ástands sem nú hefur skapast er brýnast að afnema stimpilgjöld á kaupsamninga fyrstu íbúðarkaupenda. Nákvæm tímasetning liggur þó ekki fyrir.

Fjármálaráðherra sagði á dögunum að það þyrfti að sæta heppilegu lagi gagnvart þenslu í hagkerfi og á lánamarkaði við afnám stimpilgjalda. Ég tek heils hugar undir þetta sjónarmið, enda er lækkun stimpilgjalda á þensluskeiði fyrst og fremst til þess gerð að hækka fasteignaverð enn frekar og kemur íbúðakaupendum því að litlu gagni. Ég hef þó trú á því að fljótlega skapist lag til þess ef fer sem horfir að verulega hægist um á markaði með fasteignir.

Það blasir hins vegar við að koma verður til móts við ungt fólk, tekjulága og íbúa landsbyggðarinnar við fasteignakaup. Þar kemur til kasta Íbúðalánasjóðs og hins opinbera. Starfshópur á vegum félagsmálaráðherra vinnur að tillögum á þessu sviði. Við félagsmálaráðherra höfum einnig fundað um mögulegar úrbætur síðustu daga og er að vænta tillagna fljótlega. Ekki er tímabært að rekja hugsanlegar aðgerðir opinberlega á þessum tímapunkti.

Höfundur er viðskiptaráðherra.