Ferguson: Þetta var svekkjandi

Sir Alex Ferguson sagðist hafa verið svekktur eftir að hans menn náðu aðeins jafntefli gegn Tottenham í kvöld þegar þeir þurftu svo nauðsynlega á þremur stigum að halda.

Liðin skildu jöfn 0-0 á White Hart Lane þar sem heimamenn voru hættulegri í fyrri hálfleik en gestirnir pressuðu stíft undir lokin.

"Þetta var svekkjandi því við réðum ferðinni í leiknum, sérstaklega í síðari hálfleik. Við höfðum ekki heppnina með okkur í þessum leik eins og maður þarf oft að hafa við þessar aðstæður. Markvörðurinn þeirra varði líka mjög vel í tvígang," sagði Ferguson.

Hann gaf sér þó tíma til að hrósa liði Tottenham og því góða starfi sem Harry Redknapp hefur unnið þar á bæ síðan hann tók við af Juande Ramos.

"Sá stutti, Modric, átti gott skot sem hrökk af varnarmanni okkar. Það hefði geta orðið neyðarlegt fyrir okkur ef hann hefði skorað. Það er ekki auðvelt að spila við Tottenham núna - þetta lið er á góðu skriði undir stjórn Harry Redknapp," sagði Ferguson og bætti við að hann væri annars ánægður með vinnusemi sinna manna.