Jóhann: Var ómögulegt að standa sig vel hjá KR

Jóhann Þórhallsson er genginn í raðir Fylkis eftir eins árs dvöl hjá KR. Hann segir í samtali við Vísi að dvölin hjá KR hafi ollið honum vonbrigðum.

„Já, þetta voru mikil vonbrigði. Maður gerir meiri kröfur til sín en svo. En þegar maður lítur tilbaka var í raun ómögulegt að standa sig vel. Það var mikið að þetta tímabilið en það er of mikið að fara út í þá sálma hér og nú. En það er óhætt að segja að tímabilið í fyrra hafi verið hræðilegt hjá öllum."

„Ég lagði persónulega allt mitt í þetta en það bara gekk einfaldlega ekki upp," sagði Jóhann.

KR sankaði að sér mörgum góðum leikmönnum fyrir síðasta tímabil og var Jóhann einn þeirra. En gengi liðsins á Íslandsmótinu var skelfilegt. Fyrsti sigurinn kom ekki fyrr en í áttundu umferð og KR var í neðsta sæti deildarinnar fram í sautjándu umferð með einni undantekningu. Á endanum varð liðið í áttunda sæti með sextán stig sem hefur langoftast ekki dugað til að halda sæti sínu í deildinni.

„Strax eftir tímabilið fékk KR einhver tilboð í mig og voru þeir í stjórninni þá þegar búnir að marka sér þá stefnu að losa sig við framherja og fá miðjumann í staðinn," sagði Jóhann.

„Logi (Ólafsson þjálfari KR) gerði því ráð fyrir að ég myndi fara fljótlega og hef ég þess vegna lítið fengið að spila á undirbúningstímabilinu, vil ég meina. En ég hef engar áhyggjur af því, ég hef áður lent í því að koma seint inn í undirbúningstímabilið og staðið mig svo vel í mótinu sjálfu."

Fylkir varð í fjórða sæti í Landsbankadeildinni á síðasta tímabili en hafa misst marga menn síðan þá. Þrír framherjar eru horfnir á braut en félagið fékk þó Danann Allan Dyring frá FH í haust. Með komu Jóhanns hefur nú birt til í sóknarlínu Fylkisliðsins.

„Ég er mjög ánægður og sáttur. Nú þarf bara að spýta í lófana og gera gótt mót."

Honum líst vel á framtíðina eftir að hafa rætt við Leif Garðarsson, þjálfara Fylkis, og forráðamenn liðsins að undanförnu.

„Leifur hefur trú á mér og er það mikilvægt. Ég hef ekki fundið mikið fyrir því í Vesturbænum. Mitt hlutverk í liðinu verður að spila í framlínunni sem ég tel að henti mér mun betur en á kantinum, þar sem ég spilaði helst með KR."

„Það er greinilegt að Fylkismenn stefna hátt og félagið er með góðan leikmannahóp. Ég kannast líka við Leif frá því að hann þjálfaði mig þegar ég var gutti í Þór á Akureyri og hef ég alltaf kunnað vel við hann."

„Þetta er líka fjölskylduklúbbur og hef ég alltaf þrifist í slíkum félögum. Ég er uppalinn í einum slíkum, Þór á Akureyri, og það gekk líka vel hjá mér í Grindavík þegar ég var þar."

Jóhann er 28 ára gamall og á að baki 77 leiki og 24 mörk í efstu deild hér á landi.