Flestir ánægðir með Sigmund í embætti

Um 44 prósent þeirra sem tóku afstöðu í skoðanakönnun Fréttablaðsins og Stöðvar 2 eru ánægð með störf Sigmundar Davíðs Gunnlaugssonar forsætisráðherra.

Samkvæmt niðurstöðu könnunarinnar, sem gerð var fyrir helgi, finnst 32,1 prósenti Sigmundur hafa staðið sig frekar vel og 12,1 prósenti mjög vel. Þriðjungi aðspurðra þykir hann hvorki hafa staðið sig vel né illa.

Alls sögðust 22,5 prósent telja Sigmund Davíð hafa staðið sig mjög eða frekar illa í starfi, þar af 8,8 prósent mjög illa.

Mikill meirihluti stuðningsmanna Framsóknarflokksins, 76,3 prósent, segist ánægður með störf Sigmundar Davíðs. Svipað hlutfall Sjálfstæðisfólks, 75 prósent, er sömu skoðunar. Innan við fimm prósent stuðningsmanna stjórnarflokkanna tveggja telja Sigmund Davíð hafa staðið sig illa.

Staðan er heldur önnur hjá stuðningsmönnum Samfylkingarinnar og Vinstri grænna. Aðeins um þrettán prósent stuðningsmanna Samfylkingarinnar og fimmtán prósent kjósenda Vinstri grænna telja Sigmund Davíð hafa staðið sig vel í embætti forsætisráðherra.

Stuðningsmenn Pírata eru heldur ánægðari með forsætisráðherrann, 24 prósent þeirra telja hann hafa staðið sig vel. Sömu skoðunar er þriðjungur þeirra sem kjósa myndu Bjarta framtíð yrði gengið til kosninga nú.

Karlmenn eru almennt ánægðari með Sigmund Davíð en konur. Tæp 49 prósent karla telja hann hafa staðið sig vel í starfi samanborið við tæp fjörutíu prósent kvenna.

Lítill munur er á afstöðu fólks til starfa Sigmundar Davíðs eftir búsetu, en íbúar landsbyggðarinnar eru almennt heldur jákvæðari í garð Sigmundar en þeir sem búa á höfuðborgarsvæðinu.

Hringt var í 1.077 manns þar til náðist í 800 manns samkvæmt lagskiptu úrtaki miðvikudaginn 26. júní og fimmtudaginn 27. júní. Þátttakendur voru valdir með slembiúrtaki úr Þjóðskrá. Svarendur skiptust jafnt eftir kyni, og hlutfallslega eftir búsetu og aldri. 

Spurt var: Hversu vel eða illa finnst þér Sigmundur Davíð Gunnlaugsson hafa staðið sig í embætti forsætisráðherra? Alls tók 91 prósent afstöðu til spurningarinnar.