Gat aldrei verið bæði hommi og fótboltamaður

Brasilískur knattspyrnumaður var tilneyddur til að setja fótboltaskóna upp á hillu af því að hann vildi fá að vera hann sjálfur og fá að lifa sem samkynhneigður maður. Douglas Braga sagði BBC sögu sína.

Nokkur umræða hefur verið um knattspyrnumenn og samkynhneigð að undanförnu en það virðist vera sem knattspyrnumenn eigi mjög erfitt með að koma út úr skápnum.

Knattspyrnan er nánast eins og trúarbrögð í Brasilíu og þar dreymir flesta unga menn um að verða Neymar, Ronaldo eða Pele. Einn af þeim var Douglas Braga.

Draumur hans um atvinnumennsku í knattspyrnu hófst þegar hann var tólf ára gamall í Rio de Janeiro. Hann fékk tækifæri hjá þriðjudeildarliðinu Madureira og átján ára gamall bauðst honum samningur hjá Botafogo, einu af stærstu félögunum í Ríó.

Framtíðin í fótboltanum var björt en á þessum árum breyttist margt og hann uppgötvaði kynhneigð sína. „Ég áttaði mig á því að ég var hrifinn af karlmönnum,“ sagði Douglas Braga við BBC.

Nokkur ár liðu hjá Botafogo og Douglas Braga sá liðsfélaga sína fá tækifæri hjá klúbbum í Evrópu. Hann fór líka að átta sig á því að hann gat ekki haldið áfram í fótboltanum ef hann ætlaði að vera fyrir utan skápinn.

The Brazilian footballer who never was https://t.co/fSvMqa7vuI

— BBC News (World) (@BBCWorld) January 3, 2019

„Þetta var bara val, annaðhvort ertu þú sjálfur eða þú ert fótboltamaður. Það var ekki möguleiki að vera bæði,“ sagði Douglas Braga. Hann hætti í fótboltanum aðeins 21 árs gamall. Þetta var erfiðasta ákvörðunin lífsins.

„Daginn sem ég ákvað að hætt að spila þá grét ég svo mikið. Ég gekk um grátandi í marga klukkutíma,“ sagði Douglas Braga.

Brasilíumenn eru þekktir fyrir litagleði og frjálsræði á kjötkveðjuhátíðum sínum en þegar kemur að fótboltanum þá eru fá frávik liðin.

Douglas Braga hefur verið í framlínunni í baráttunni gegn fordómum gagnvart samkynhneigðum í Brasilíu. Hann spilar nú með áhugamannaliðinu BeesCats sem er félag sem gefur LGBT fótboltamönnum tækifæri til að spila í Ríó. Þeir spila við önnur samskonar lið í LiGay deildinni.

Það breytir ekki því að Douglas Braga saknar þess mikið að fá ekki tækifærið til að spila áfram alvöru fótbolta.

„Það er sárt að fylgjast með gömlu vinunum spila enn sem atvinnumenn. Það er virkilega sárt,“ sagði Douglas Braga.

Það má lesa þessa fróðlegu grein BBC um Douglas Braga, samkynhneigð og fótbolta í Brasilíu með því að smella hér.