Frír bjór og bollakaka fyrir þá sem mæta

Leicester City ætlar að halda upp á afmæli Vichai Srivaddhanaprabha með sérstökum hætti þegar liðið fær Bournemouth í heimsókn í ensku úrvalsdeildinni á morgun.

Vichai Srivaddhanaprabha var eigandi Leicester þar til að hann lést í þyrluslysi í október síðastliðnum ásamt fjórum öðrum fyrir utan King Power leikvanginn. Vichai hefði orðið 61 árs gamall 4. apríl.

#lcfc fans attending #LeiBou are invited to celebrate our late Chairman’s birthday with a free beer or water and a cupcake on the Srivaddhanaprabha family.

— Leicester City (@LCFC) March 28, 2019

Þetta verður fyrsta afmæli Vichai Srivaddhanaprabha eftir að hann lést en eigandinn var mjög vinsæll og virkur þátttakandi í samfélaginu í Leicester.

Hann var alltaf mjög gjafmildur í kringum afmælið sitt meðan hann lifði og stuðningsmenn Leicester City nutu alltaf góðs á því á heimaleikjum liðsins í kringum afmælið.

Hápunkturinn á hans tíma var án efa þegar Leicester City kom öllum að óvörum og varð Englandsmeistari vorið 2016.

Fjölskylda Vichai Srivaddhanaprabha vill minnast hans með því að halda í þessa hefð að koma færandi hendi í tilefni afmælisins.

Til að minnast Vichai þá ætlar Leicester City að bjóða þeim sem mæta á leik Leicester og Bournemouth á King Power leikvanginum upp á bjór og bollaköku. Fjölskylda Srivaddhanaprabha mun taka á sig reikninginn.

Þeir sem drekka ekki og vilja ekki bjór geta fengið vatn. Gestirnir verða líka að nýta þetta boð áður en leikurinn fer í gang (fyrir klukkan 14.45) en hann hefst klukkan þrjú á morgun.

Það er líka tekið fram að það er bara eitt bjórglas og ein bollakaka á hvern miða.