Innlent

Am­feta­mín­fram­leiðsla í Borgar­firði: Vitnið sem tók á sig sök gat ekki lýst fram­leiðslu­ferli am­feta­míns

Hallgerður Kolbrún E. Jónsdóttir skrifar
Alvar Óskarsson, Einar Jökull Einarsson og Margeir Pétur Jóhannsson voru í dag dæmdir í sjö og sex ára fangelsi fyrir fíkniefnaframleiðslu.
Alvar Óskarsson, Einar Jökull Einarsson og Margeir Pétur Jóhannsson voru í dag dæmdir í sjö og sex ára fangelsi fyrir fíkniefnaframleiðslu. Vísir/Vilhelm

Sakborningar í umfangsmiklu amfetamínmáli fengu þunga dóma fyrir aðild þeirra að málinu en dómur féll í Héraðsdómi Reykjavíkur fyrr í dag. Mennirnir þrír voru dæmdir fyrir framleiðslu á átta kílóum af amfetamíni í sumarbústað í Borgarfirði.

Alvar Óskarsson var dæmdur í sjö ára fangelsi og Einar Jökull Einarsson og Margeir Pétur Jóhannsson voru dæmdir í sex ára fangelsi fyrir fíkniefnaframleiðslu. Margeir var sá eini sem var viðstaddur við dómsuppkvaðninguna. Bæði hann og Alvar hafa áfrýjað dómunum. Alvar og Einar Jökull hafa báðir verið sakfelldir fyrir stórfelld fíkniefnabrot en Margeir á engan sakaferil að baki.

Sjá einnig: Þungir dómar vegna amfetamínframleiðslu í Borgarfirði

Þremenningarnir voru einnig ákærðir fyrir framleiðslu á 206 kannabisplöntum í Þykkvabæ. Einar neitaði þar sök, Margeir játaði brotið og játið Alvar einnig að hafa átt hlutdeild í þeirri ræktun. Þá hafa þrír aðrir stigið fram og játað aðild sína að framleiðslunni.

Margeir Pétur Jóhannsson, hér hulinn klæðum, var sá eini sem var viðstaddur dómsuppkvaðninguna.Vísir/Vilhelm

Skömmu áður en málið fór fyrir dómstóla gaf sig fram fjórði maður sem tók á sig alla sök í amfetamínframleiðslunni. Fram kemur í niðurstöðu dómsins að maðurinn, sem er kallaður vitni J í dómnum, hafi gefið sig fyrst fram eftir að ákæra vegna málsins hafði verið gefin út og þremenningarnir höfðu setið nokkra mánuði í gæsluvarðhaldi vegna þess. Vitnið hafi ekki gefið trúverðugar skýringar fyrir því. Framburður hans hafi auk þess verið ótrúverðugur og til þess fallinn að afvegaleiða við úrlausn málsins.

Reglur giltu um hvernig staðið skyldi að umsjón með kannabisræktun

Þremenningarnir voru allir ákærðir fyrir að hafa haft í vörslum sínum, í sölu- og dreifingarskyni, 206 kannabisplöntur, 111,5 grömm af kannabisstönglum og að hafa um nokkurt skeið ræktað þessar plöntur.

Margeir játaði á sig þessi brot og játaði Alvar að hafa átt minni háttar aðild að brotinu. Hann lýsti aðild sinni þannig að hann hafi verið ráðinn fyrir tímakaup til að sinna ræktuninni, meðal annars á þeim tíma sem eigendurnir voru erlendis.

Sumarbústaðurinn í Heyholtslandi í Borgarfirði þar sem amfetamínsframleiðslan fór fram.

Rannsóknargögn lögreglu benda til þess að Alvar hafi ítrekað farið í ræktunina og að hann hafi fylgt ákveðnum reglum um það hvernig staðið skyldi að umsjón með ræktuninni. Hann fór aldrei á staðinn með eigin síma eða á eigin bifreið. Þá var bifreið notuð sem var skráð í eigu annars vitnis, vitnis F, og afhenti Alvar sjálfur F fé til að greiða tryggingar vegna bifreiðarinnar.

Alvar bar sjálfur vitni um það að hann hafi keypt aðföng fyrir ræktunina og aðstoðað við uppsetningu á henni.

Þá neitar Einar allri sök en hann fór inn í útihúsið sem ræktunin fór fram í en ekki inn í ræktunina sjálfa. Þá sagðist hann hafa verið á staðnum til að athuga með hest fyrir dóttur sína. Þá voru gögn ekki næg til að benda til þess að Einar hafi átt þátt í kannabisræktuninni en þess er getið í dómnum að Einar hafi verið erlendis á meðan Almar sinnti ræktuninni á meðan eigendur hennar voru erlendis.

Vitnið J tekur á sig alla sök

Þremenningarnir neituðu allir sök um að hafa tengst amfetamínframleiðslunni en alls var lagt hald á tæp 8.600 grömm af efninu. Þeir gagnrýndu allir rannsókn málsins þar sem gögnum hafi verið haldið frá þeim og þeir þar af leiðandi hefðu ekki getað sýnt fram á að þeir hafi verið viðstaddir annars staðar í einhverjum tilvikum.

Þeir viðurkenndu þó allir að hafa verið á vettvangi þann 7. júní síðastliðinn en lögreglan stöðvaði framleiðsluna þann dag.

Vitni J sem gaf sig fram eftir að ákæra birtist í málinu, hélt því fram að hafa átt fíkniefnin og framleitt þau úr amfetamínbasa. Þá lýsti vitnið tildrögum þess að hann ákvað að framleiða efnið, leiðinni að sumarhúsinu og framleiðslu efnanna hjá lögreglu og fyrir dómi.

Framburður hans tók nokkrum breytingum fyrir dómi og sagðist vitnið meðal annars hafa ratað í Borgarnes með því að nota Google Maps en þaðan hafi hann keyrt hjálparlaust. Hann hafði þó lýst því fyrir lögreglu að hann notaði forritið alla leið. Fyrir dómi sagðist hann ekki hafa slegið heimilisfangið inn í símann sinn ef verið væri að fylgjast með honum.

Þá gat hann ekki lýst framleiðsluferli amfetamínsins nákvæmlega og sagðist hann meðal annars hafa notað kaffipoka til að ná vökva úr efninu en undirþrýstingsdæla var nauðsynleg til að ná vökvanum úr svo miklu magni. Vitnisburður hans af aðstæðum í sumarhúsinu og framleiðsluferli efnisins breyttust einnig fyrir dómi.

Þá kvaðst hann hafa fengið lánaðan búnað til framleiðslunnar hjá pólskum félaga sínum en sá búnaður fannst á heimili hans við húsleit. Honum voru einnig sýndir tveir kaffipokar fyrir dómi sem fundust í sumarhúsinu og á þeim voru handskrifaðir útreikningar. Vitnið gat ekki staðfest það hvort hann hefði ritað á annan pokann og gat hann heldur ekki útskýrt útreikningana.

Gögn um notkun á greiðslukorti vitnisins benda einnig til þess að hann hafi verið á ferðinni þann 7. júní og ber vitnisburði hans um framleiðslustig efnisins ekki heim og saman við ástand þess þegar lögreglu bar að garði en þá átti aðeins eftir að þurrka efnið.

Amfetamínsmituð KitchenAid-hrærivél

Mennirnir þrír voru undir eftirliti lögreglu þann 7. júní sem var upphaflega tilkomið vegna grunsemda um að Alvar stæði að framleiðslu og dreifingu fíkniefna. Með þessu eftirliti fylgdi lögregla Alvari og Margeiri til Keflavíkur um morguninn og Alvari og Einari í sumarhúsið síðar um daginn auk þess sem Margeiri var fylgt í ræktunina í Þykkvabæ.

Þremenningarnir voru meðal annars ákærðir fyrir vörslu og ræktun kannabis en 206 kannabisplöntur fundust í vörslu þeirra.getty/Christopher Furlong

Þar var fylgst með ákærðu flytja kassa á milli bifreiða auk þess sem lögreglumenn fylgdust með sumarhúsinu þar sem þeir fylgdust með mannaferðum. Þá báru lögreglumenn sem sinntu eftirfylgninni vitni um það að Einar og Alvar hafi verið einir í sumarhúsinu þar til Margeir kom þangað. Einar og Alvar sögðu Margeir ekki hafa vitað af því sem fór fram í húsinu og hann hafi fengið mikið áfall þegar hann hafi komist að því. Þetta er ekki í samræmi við framburð lögreglumanna sem hlýddu á samskipti þeirra.

Eftirlitsbúnaðinum var komið fyrir í bifreið Alvars, en hann var stöðvaður af lögreglu þann 10. maí síðastliðinn. Þar sáu lögreglumenn tvær rauðar KitchenAid-hrærivélar í bifreiðinni en í skálum þeirra voru hvítar efnisleifar, öndunargrímur og annar búnaður sem lögreglumenn töldu að nota mætti til framleiðslu amfetamíns.

Sjá einnig: Kitchena­id-hræra og kaffi­pokar notuð við fram­leiðslu am­feta­míns í bú­staðnum í Borgar­firði

Samskonar öndunargrímur og hrærivél með sama serial- og módelnúmer fundust í sumarhúsinu.

Hafði 7,8 g af amfetamíni á sér fyrir mistök

Alvar var einnig ákærður fyrir að hafa haft í bifreið sinni 7,78 g af amfetamíni þegar hann var stöðvaður af lögreglu á Vesturlandsvegi. Alvar játaði að hafa haft efnið í vörslu en sagðist hann hafa tekið efnið með sér úr sumarhúsinu fyrir mistök. „Hann var með efnið í vasa sínum og vissi af því þar og er því fullnægt huglægum refsiskilyrðum fyrir því að ákærði verði sakfelldur fyrir brotið,“ kemur fram í dómsúrskurði.

Þá var Margeir einnig ákærður fyrir vopnalagabrot en við húsleit heima hjá honum fannst hnúajárn. Hann sagði hlutinn ekki vera vopn heldur væri það beltissylgja en var það mat dómsins að um hnúajárn hafi verið að ræða.

Hægt er að skoða dóminn í heild sinni hér.


Tengdar fréttir

Krefst sex til átta ára fangelsisdóms yfir Alvari og Einari

Saksóknari í umfangsmiklu amfetamínsmáli krefst sex til átta ára fangelsis yfir Alvari Óskarssyni, Einari Jökuli Einarssyni og Margeiri Pétri Jóhannssyni sem sæta ákæru fyrir amfetamínsframleiðslu í sumarbústaði í Borgarfirði.




Fleiri fréttir

Sjá meira


×