Innlent

Þungir dómar vegna amfetamínframleiðslu í Borgarfirði

Kolbeinn Tumi Daðason og Tryggvi Páll Tryggvason skrifa
Margeir huldi höfuð sitt þegar hann var leiddur út úr dómsal. Með honum á myndinni er Steinbergur Finnbogason, verjandi hans.
Margeir huldi höfuð sitt þegar hann var leiddur út úr dómsal. Með honum á myndinni er Steinbergur Finnbogason, verjandi hans.

Sakborningar í umfangsmiklu amfetamínsmáli fengu þunga dóma fyrir aðild þeirra að málinu þegar dómur var kveðinn upp í málinu í Héraðsdómi Reykjavíkur nú fyrir stundu.

Alvar Óskarsson var dæmdur í sjö ára fangelsi og Einar Jökull Einarsson og Margeir Pétur Jóhannsson voru dæmdir í sex ára fangelsi fyrir framleiðslu á átta kílóum af amfetamíni í sumarbústaði í Borgarfirði. Margeir var sá eini sem viðstaddur var dómsuppkvaðninguna. Saksóknari hafði krafist sex til átta ára fangelsis yfir sakborningunum.

Þeir Alvar og Einar Jökull fengu þunga dóma í Pólstjörnumálinu árið 2008. Einar Jökull var dæmdur í níu og hálfs árs fangelsi en Alvar sjö ára fangelsi. Margeir Pétur á ekki að baki sakaferil.

Sjá einnig: Kitchenaid-hræra og kaffipokar notuð við framleiðslu amfetamíns í bústaðnum í Borgarfirði

Þremenningarnir voru einnig ákærðir fyrir framleiðslu á 206 kannabisplöntum í Þykkvabæ. Einar og Margeir neituðu sök en Alvar játaði minniháttar hlutdeild í þeirri ræktun.

Margeir Pétur Jóhannsson, hér hulinn klæðum, var sá eini sem var viðstaddur dómsuppkvaðninguna. Vísir/Vilhelm

Framleiðslan var stöðvuð í aðgerð lögreglu 7. júní í sumar. Sama dag var umfangsmikil kannabisframleiðsla stöðvuð í Þykkvabæ. Lögreglan hafði haft málið til rannsóknar í tæpt hálft ár eftir að grunur vaknaði um að Alvar Óskarsson, einn hinna ákærðu, stæði að umfangsmikilli fíkniefnaframleiðslu.

Dagana fyrir handtökuna hafði lögreglu beitt rannsóknaraðferð sem hún kýs að kalla skyggingu. Er um að ræða aðgerð þar sem óeinkennisklæddir lögreglumenn fylgdust með ferðum sakborninga úr fjarska. Þar á meðal komu lögreglumennirnir sér fyrir á sjónpóstum í grennd við sumarbústaðinn í Heyholti og fylgdust með ferðum og athæfi sakborninga.

Þrír til viðbótar hafa þegar játað aðild sína að kannabisframleiðslunni í Þykkvabæ og hlotið skilorðsbundna dóma fyrir.

Fjórði maður steig fram skömmu áður en málið fór fyrir dómstóla og tók á sig alla sök í málinu. Saksóknari sagði framburð þess manns mjög ósannfærandi og bæri þess merki að hann vissi lítið en hefði séð myndir af sumarbústaðnum þar sem framleiðslan fór fram.

„Dómurinn er mikil vonbrigði fyrir umbjóðanda minn og honum hefur nú þegar verið áfrýjað,“ segir Steinbergur Finnbogason, lögmaður Margeirs, í samtali við Vísi. Hann eigi eftir að leggjast yfir dóminn og skoða hann en það verður vænn lestur enda sé dómurinn upp á sextíu blaðsíður.


Tengdar fréttir

Krefst sex til átta ára fangelsisdóms yfir Alvari og Einari

Saksóknari í umfangsmiklu amfetamínsmáli krefst sex til átta ára fangelsis yfir Alvari Óskarssyni, Einari Jökuli Einarssyni og Margeiri Pétri Jóhannssyni sem sæta ákæru fyrir amfetamínsframleiðslu í sumarbústaði í Borgarfirði.

Vinur Pól­stjörnu­manna tekur á sig alla sök og segist plagaður af sam­visku­biti

Þremenningarnir sem ákærðir eru fyrir amfetamínframleiðslu í Borgarfirði neituðu allir sök við aðalmeðferð málsins í Héraðsdómi Reykjavíkur. Íslendingur, sem sendi lögreglu, saksóknara og verjendum bréf þar sem hann lýsti yfir ábyrgð á amfetamínframleiðslunni, hélt frásögn sinni til streitu við aðalmeðferð málsins og segist plagaður af samviskubiti.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.