Huldu and­lit sín við þing­festingu í stóra am­feta­mín­málinu

Þeir sem eru ákærðir fyrir stórfellt fíkniefnalagabrot tóku margir hverjir ekki afstöðu til ákærunnar við þingfestingu málsins í morgun vegna þess að rannsókn anga málsins er ekki lokið. Sex eru ákærðir fyrir ræktun kannabis í nágrenni við Hellu en þrír þeirra eru ákærðir fyrir framleiðslu á rúmum átta kílóum af amfetamíni í sumarbústað í Borgarfirði.

Lögreglan rannsakar meint peningaþvætti í tengslum við þessa fíkniefnaframleiðslu en þeirri rannsókn hefur ekki verið lokið. Því hefur ekki verið gefin út ákæra vegna peningaþvættisins en hefur lögreglan lokið rannsókn á fíkniefnaframleiðslunni og hefur saksóknari ákært í málinu.

Karl Steinar Valsson, yfirlögregluþjónn á höfuðborgarsvæðinu sagði við fréttastofu Ríkisútvarpsins fyrir skemmstu að rannsókn málsins væri langt komin. Saksóknari upplýsti þó við þingsetningu í Héraðsdómi Reykjavíkur í dag að rannsókninni á peningaþvættisanga málsins væri hvergi nærri lokið og óvíst hvenær henni verði lokið.

Sjá einnig: Kitchenaid-hræra og kaffipokar notuð við framleiðslu amfetamíns í bústaðnum í Borgarfirði

Af þeim sökum neituðu þeir sem ákærðir eru fyrir fíkniefnaframleiðsluna að tjá sig um sakarefnið.

Gagnrýndi ákæruvaldið harðlega

Alvar Óskarsson og Einar Jökull Einarsson, sem hlutu þunga dóma í Pólstjörnumálinu svokallaða sem varðaði stórfellt fíkniefnasmygl, er ákærðir fyrir framleiðslu amfetamíns í Borgarfirði ásamt Margeiri Pétri Jóhannsson.

Lögmaður Alvars er Stefán Karl Kristjánsson en hann gagnrýndi saksóknara harðlega í héraðsdómi í morgun. Sagði hann ákæruvaldinu hafa legið á við að gefa út ákæru í málinu. Þess vegna hafi málinu verið skipt upp í tvo anga, annars vegar fyrir fíkniefnaframleiðslu og hins vegar fyrir peningaþvætti. Vildi Stefán Karl meina að það hafi verið gert til að halda sakborningum lengur í gæsluvarðhaldi.

Benti Stefán Karl á að á þeim fjórtán vikum sem sakborningar hafi verið í gæsluvarðhaldi hafi ekki verið tekið ein skýrsla af þeim vegna peningaþvættismálsins. Saksóknari sagði það vera rétt því málið væri ekki tækt til skýrslutöku því gagnaöflun væri ekki lokið.

Einn verjanda þeirra sex sem eru ákærðir í málinu spurði hvort það væri hreinlega ekki þannig að enga slóð um peningaþvætti væri að finna því árvökul lögregla hefði komið í veg fyrir að þess brot næðu fram að ganga?

Tóku verjendur margra af þeim ákærðu undir orð Stefáns Karls.

Tveir játuðu aðild að kannabisframleiðslu

Eins og fyrr segir eru þeir Alvar, Einar og Margeir ákærðir fyrir framleiðslu amfetamíns í Borgarfirði en þeir eru ákærðir ásamt þremur öðrum fyrir kannabis framleiðslu nærri Hellu.

Margeir játaði ásamt öðrum sakborningi að hafa staðið að kannabisframleiðslu nærri Hellu en þó með fyrirvara um endanlega magntölu.

Í ákærunni kemur fram að lögreglan hafi lagt hald á 206 kannabisplöntur, 111,50 grömm af kannabisstönglum og 823 grömm af maríjúana.

Enginn af sakborningunum könnuðust við þessi 823 grömm af maríjúana og vildu fá nánari útskýringu á því hvaðan þau koma. Lofaði saksóknari að leggja fram skýrslu frá lögreglu um þann fund.

Ákvað dómari málsins að fresta því til 20. september næstkomandi.

Skýra þarf peningagjörninga

Varðandi rannsóknina á peningaþvættismálinu þá sagði Karl Steinar Valsson í viðtali við RÚV að skýra þyrfti ansi mikla peningagjörninga sem hefðu átt sér stað innan þess hóps sem væri ákærður fyrir fíkniefnaframleiðsluna og utan hans einnig.

„Þannig að mér reiknast svona til í fljótu bragði að við séum með ýmis verðmæti, húseignir, bíla, ýmsa fjármuni, lausafé og fleira, svona eitthvað, það er nú farið að slá upp í 100 milljónir held ég, sem eru með mismunandi þvingunarþætti á sér, eftir því hvers eðlis hlutirnir eru,“ sagði Karl Steinar við fréttastofu RÚV.

Þá sagði Karl Steinar að rannsóknin á peningaþvættinu væri langt komin. Grunur léki á að fé hefði verið þvættað í gegnum atvinnurekstur en hann gat ekki tjáð sig frekar um þann hluta rannsóknarinnar.