Íslenski boltinn

Níu vörður á ferli Margrétar Láru

Ingvi Þór Sæmundsson skrifar
Margrét Lára lék sinn fyrsta leik í meistaraflokki árið 2000 og þann síðasta 19 árum síðar.
Margrét Lára lék sinn fyrsta leik í meistaraflokki árið 2000 og þann síðasta 19 árum síðar.

Margrét Lára Viðarsdóttir, markahæsti leikmaður íslenska kvennalandsliðsins frá upphafi, hefur lagt skóna á hilluna.



Markadrottningin úr Vestmannaeyjum átti glæsilegan feril. Hún varð fimm sinnum Íslandsmeistari með Val og einu sinni bikarmeistari. Margrét Lára varð markahæst í efstu deild á Íslandi fimm sinnum í röð auk þess sem hún vann gullskóinn í Svíþjóð.

Hún skoraði 79 mörk í 124 landsleikjum á árunum 2003-19, þar af sex þrennur, og fór með íslenska landsliðinu á tvö stórmót (EM 2009 og 2013).

Margrét Lára var valinn Íþróttamaður ársins 2007 og var fjórum sinnum valin Knattspyrnukona ársins.

Hér fyrir neðan má lesa um níu (að sjálfsögðu) merkilegustu vörðurnar á ferli Margrétar Láru.

Fyrsta landsliðsmarkið

Það tók Margréti Láru ekki langan tíma að skora fyrsta landsliðsmarkið sitt. mynd/e.ól.

Margrét Lára skoraði sitt fyrsta landsliðsmark af 79 í fyrsta landsleiknum sínum gegn Ungverjalandi í undankeppni EM á Laugardalsvellinum 14. júní 2003.

Margrét Lára kom inn á sem varamaður fyrir Málfríði Ernu Sigurðardóttur á 66. mínútu. Fjórum mínútum skoraði þessi 16 ára leikmaður ÍBV með sinni fyrstu snertingu í landsliðsbúningnum. Hún skallaði þá boltann í netið af stuttu færi.

Fullkoma árið 2007

Margrét Lára fagnar einu 38 marka sinna sumarið 2007. Í bakgrunni er auglýsing sem lék í fyrir TM. vísir/valli

Góðærið náði hápunkti árið 2007, líka inni á vellinum hjá Margréti Láru. Hún skoraði þá 38 mörk í 16 leikjum (!) þegar Valur varð Íslandsmeistari annað árið í röð. Enginn leikmaður hefur skorað fleiri mörk á einu tímabili í efstu deild kvenna á Íslandi.

Margrét Lára skoraði fjórum sinnum þrjú mörk í leik, einu sinni fjögur mörk og tvisvar sinnum sex mörk. Hún skoraði í 13 af 16 deildarleikjum Vals.

Þá skoraði Margrét Lára átta mörk fyrir íslenska landsliðið á árinu, m.a. sigurmarkið gegn sterku liði Frakklands á Laugardalsvelli.

Íþróttamaður ársins

Margrét Lára með verðlaunagripinn fyrir að vera valinn Íþróttamaður ársins. Með henni á myndinni eru foreldrar hennar. vísir/vilhelm

Margrét Lára var valinn Íþróttamaður ársins af Samtökum íþróttafréttamanna 2007. Afrek hennar það árið voru tíunduð hér fyrir ofan.

Margrét var fjórða konan sem var valin Íþróttamaður ársins og fyrsta fótboltakonan. Hún fékk 496 atkvæði í kjörinu og var 177 atkvæðum á undan næsta manni (Ólafi Stefánssyni).

EM-sætið tryggt

Margrét Lára fagnar marki sínu gegn Írlandi. vísir/stefán

Íslenska kvennalandsliðið tryggði sér sæti í lokakeppni stórmóts (EM 2009) í fyrsta sinn með 3-0 sigri á Írlandi á flughálum Laugardalsvelli 30. október 2008.

Ísland var í góðri stöðu eftir 1-1 jafntefli í fyrri leiknum í Dublin. Í seinni leiknum voru Íslendingar svo mun sterkari aðilinn og unnu 3-0 sigur. Margrét Lára skoraði annað mark Íslands. Það var hennar tólfta mark í undankeppninni þar sem hún varð markahæst.

Markahæst í Svíþjóð

Margrét Lára fékk sex gullskó á ferlinum. vísir/daníel

Margrét Lára varð fimm sinnum markahæst í efstu deild á Íslandi (2004-08) áður en hún fór í atvinnumennsku. Þar nældi hún sér í einn gullskó til viðbótar.

Tímabilið 2011 var Margrét Lára markahæst í sænsku úrvalsdeildinni ásamt hinni hollensku Manon Melis. Margrét Lára skoraði 16 mörk fyrir Kristianstad þar sem hún lék aftur undir stjórn Elísabetar Gunnarsdóttur. Margrét Lára skoraði tæplega helming marka Kristianstad í deildinni. Auk þess gaf hún fimm stoðsendingar.

Markið gegn Noregi

Margrét Lára skoraði annað af tveimur mörkum Íslands á EM 2013. vísir/vilhelm

Margrét Lára brenndi af vítaspyrnu í fyrsta leik Íslands á EM 2009. Hún skoraði hins vegar úr vítaspyrnu í fyrsta leik Íslands á EM 2013.

Noregur komst yfir á 26. mínútu en Margrét Lára jafnaði þremur mínútum fyrir leikslok og tryggði Íslandi sitt fyrsta stig á stórmóti. Í lokaleik riðlakeppninnar vann Ísland 1-0 sigur á Hollandi og komst þar með í 8-liða úrslit. Þar mætti Ísland heimaliði Svíþjóðar og tapaði, 4-0.

Hundraðasti landsleikurinn

Margrét Lára var heiðruð fyrir 100. landsleikinn. vísir/vilhelm

Margrét Lára lék sinn 100. landsleik þegar Ísland vann 2-0 sigur á Hvíta-Rússlandi 22. september 2015. Hún varð sú fimmta til að ná þeim áfanga á eftir Katrínu Jónsdóttur, Þóru B. Helgadóttur, Eddu Garðarsdóttur og Dóru Maríu Lárusdóttur.

„Þetta er mjög stór stund. Ég þakka bara bara kærlega fyrir mig. Maður er hálf hrærður bara yfir þessu. Ég veit ekki alveg hvað ég get sagt. Ég er orðlaus,“ sagði Margrét Lára við Vísi eftir þennan tímamótaleik. Hún fékk gullið tækifæri til að skora í honum en skaut yfir úr vítaspyrnu.

Kvaddi með titli

Margrét Lára lyftir Íslandsmeistarabikarnum ásamt systur sinni, Elísu. vísir/daníel þór

Eftir að hafa misst af stórum hluti tímabilsins 2017, og EM það sumarið vegna krossbandsslita, og öllu tímabilinu 2018 vegna barneigna sneri Margrét Lára aftur á völlinn með Val í sumar.

Margrét Lára skoraði 15 mörk í 17 leikjum fyrir Val sem varð Íslandsmeistari í fyrsta sinn síðan 2010. Margrét Lára skoraði í sínum síðasta deildarleik á ferlinum, 3-2 sigri á Keflavík sem tryggði Val titilinn.

Alls skoraði Margrét Lára 207 mörk í 143 leikjum í efstu deild á Íslandi. Aðeins Olga Færseth (269 mörk) hefur skorað fleiri.

Síðasta landsliðsmarkið

Margrét Lára skoraði með sinni fyrstu snertingu í fyrsta landsleiknum og með sinni síðustu snertingu í síðasta landsleiknum. Í báðum leikjunum kom hún inn á sem varamaður.

Þann 8. október síðastliðinn vann Ísland 0-6 sigur á Lettlandi í undankeppni EM 2021. Margrét Lára skoraði sjötta mark Íslands og sitt 79. landsliðsmark þegar fimm mínútur voru komnar fram yfir venjulegan leiktíma. Það reyndist hennar síðasta mark á ferlinum.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.