UFC 244 fer fram í nótt í Madison Square Garden í New York. Þar munu þeir Jorge Masvidal og Nate Diaz mætast í aðalbardaga kvöldsins.



Þeir Nate Diaz og Jorge Masvidal hafa lengi verið vinsælir hjá harðkjarna MMA aðdáendum enda tveir bardagamenn sem koma til dyranna eins og þeir eru klæddir. Á síðustu árum hafa þeir þó orðið stjörnur í MMA heiminum og berjast í aðalbardaga kvöldsins á einu stærsta bardagakvöldi ársins.



Nate Diaz var lengi bara þekktur sem yngri bróðir Nick Diaz en Nick var á sínum tíma einn besti bardagamaður heims. Nate Diaz var í skugga bróður síns en eftir óvæntan sigur á Conor McGregor varð Nate skyndilega eitt stærsta nafnið í MMA heiminum.



Það var því mikil spenna þegar hann snéri aftur í búrið í ágúst eftir þriggja ára fjarveru. Nate sigraði þá Anthony Pettis og skoraði á Jorge Masvidal. Nate vildi fá að berjast við alvöru bardagamenn og það er Jorge Masvidal svo sannarlega. Upp frá því varð BMF-beltið til eða Baddest Motherfucker beltið sem barist verður um í nótt.



Jorge Masvidal hefur barist lengi á stóra sviðinu en aldrei náð almennilegri sigurgöngu til að fá titilbardaga og komast almennilega í sviðsljósið. Masvidal var virtur en engin stjarna og ætlaði UFC að nota hann til að byggja upp Darren Till í London. Svakalegt rothögg Masvidal og slagsmál baksviðs við Leon Edwards (Three piece and a soda!) komu honum í sviðsljósið. Fljótasta rothögg í sögu UFC gerði hann svo að alvöru nafni.



Ekkert hefur breyst hjá Masvidal þannig séð, hann hefur alltaf verið skemmtilegur og áhugaverður karakter en nú beinast fleiri augu að honum.



Líkt og Nate Diaz er Masvidal með áhugaverðan bakgrunn. Masvidal átti erfitt uppdráttar í æsku, pabbinn í fangelsi, ekki mikið fé til á milli handanna, barðist í skipulögðum götuslagsmálum fyrir pening og ekki margt sem benti til þess að hann ætti eftir að ferðast um í einkaþotum í framtíðinni.



Masvidal vissi þó að hann væri góður að berjast og elskaði að æfa. Hann lagði hart að sér á meðan hann svaf í bílnum eða á dýnunum í bardagaklúbbnum og hefur náð að skapa sér gott líf í bardagabransanum.



Nate Diaz og bróðir hans Nick ólust ekki upp við kjöraðstæður heldur. Þeir koma frá Stockton í Kaliforníu sem hefur verið lýst sem einni ömurlegustu borg Bandaríkjanna, þurftu snemma að læra að verja sig og einstæð móðir þeirra vann myrkranna á milli til að sjá fyrir þeim. Líkt og hjá Masvidal komu bardagaíþróttirnar þeim á beinu brautina.



Masvidal og Nate Diaz bera mikla virðingu fyrir hvor öðrum enda koma þeir úr svipuðum aðstæðum. Það hefur ekkert verið um skítkast þeirra á milli til að selja bardagann en þrátt fyrir það er gríðarlega mikill áhugi á bardaganum. Báðir eru svo áhugaverðar manneskjur inn að beini, með skemmtilega stíla og gefa ekkert eftir í búrinu. Þetta verður því alvöru bardagi þegar þeir Masvidal og Nate Diaz berjast um BMF-beltið.



Bardaginn er aðalbardaginn á UFC 244 sem fer fram í nótt en bein útsending hefst kl. 2 á Stöð 2 Sport.