Sport

Frá slagsmálum í bakgörðum Miami á stóra sviðið í New York | Ótrúleg saga Masvidal

Henry Birgir Gunnarsson skrifar
Masvidal skömmu áður en hann rotaði Askren.
Masvidal skömmu áður en hann rotaði Askren. vísir/getty

Hinn 34 ára gamli MMA-kappi Jorge Masvidal er að lifa bandaríska drauminn og hann nær hámarki um komandi helgi þegar hann er í aðalbardaga í Madison Square Garden. Líf hans hefur breyst mikið síðasta árið.

Fyrir nánast sléttum tveimur árum tapaði hann sínum öðrum bardaga í röð og ferillinn var á hraðri niðurleið. Hann barðist ekkert árið 2018 og var að falla í gleymskunnar dá er hann fékk tækifæri gegn Englendingnum Darren Till í London í mars á þessu ári.

Átti hann eflaust að vera fallbyssufóður fyrir Bretann kröftuga en Masvidal þaggaði niður í O2-höllinni og MMA-heiminum með rosalegu rothöggi sem heyrðist um heim allan.




Eftir bardagann réðst hann svo að Leon Edwards baksviðs en Edwards hafði skömmu áður haft betur gegn Gunnari Nelson.



Masvidal lét reyndar öllum illum látum í London og lét Gunnar meðal annars heyra það í spjalli við Vísi. Öll þessi læti í bland við rothöggið skilaði Masvidal mikilli athygli.




Í kjölfarið fékk hann bardaga gegn nýju vonarstjörnu UFC, Ben Askren, í júlí. Það tók Masvidal aðeins fimm sekúndur að rota Askren með mögnuðu hnésparki. Aldrei hafði bardagi verið kláraður svo snemma í sögu UFC. Masvidal var orðin stjarna og er nú á allra vörum í aðdraganda bardagans gegn Nate Diaz um BMF-beltið eða Baddest Motherfucker-beltið.



„Ég barðist flotta bardaga 2016 og 2017 en fannst ég ekki fá þá virðingu sem ég átti skilið. Núna í fyrsta skipti er ég að fá það sem ég á skilið,“ sagði Masvidal við ESPN.

Lífið hefur svo sannarlega ekki leikið við hann. Faðir hans er flóttamaður frá Kúbu sem flaut yfir til Flórída á traktors-dekki í viku og hann ólst upp í mikilli fátækt í Miami.

Hann hefur þurft að berjast fyrir lífi sínu alla tíð og það oftar en ekki í bókstaflegri merkingu. Fjórtán ára gamall var Masvidal barinn svo illa að hann endaði á spítala stórslasaður. Þá sór hann að láta aldrei aftur fara svona með sig.

Masvidal mætti alla daga í skólann eftir þetta með sokk og inn í honum var þungur lás. Vopn sem myndi brjóta hausa. Hann byrjaði þess utan að skipuleggja hefnd sína gegn ofbeldismönnunum.



Ekki bætti úr skák að faðir hans var í fangelsi frá því Jorge var 4 ára og þar til hann varð 22 ára. Það var ekki fyrr en hann varð 13 ára samt sem hann komst að því að pabbi sinn sæti í steininum fyrir að selja fíkniefni. Móðir hans hafði logið því að honum að pabbinn væri í hernum.

„Mér var sparkað úr skólanum og það var stanslaust vesen á mér. Mamma sagði alltaf að ég yrði bara eins og pabbi minn en mér fannst ekkert að því enda hélt ég að hann væri í hernum,“ sagði bardagakappinn en hann byrjaði að heimsækja föður sinn í fangelsið er hann komst að sannleikanum.



Það átti eftir að hjálpa honum mikið. Pabbi hans var rödd skynseminnar er Jorge var að fara fram úr sér. Eins og þegar hann ætlaði að hefna sín á mönnunum sem komu honum á spítala.

„Sem betur fer talaði hann mig af því. Hann sagði við mig að ég myndi enda með honum í steininum. Þetta hafði mikil áhrif á mitt líf,“ sagði Masvidal en hann hefur alla tíð síðan verið mjög náinn föður sínum.

Pabbi hans slapp samt ekki úr steininum fyrr en fjórum árum eftir að strákurinn var byrjaður að berjast sem atvinnumaður. Hann þurfti að horfa á bardagana í sjónvarpinu. Eftir að hann komst út hefur hann fylgt syni sínum út um allt. Hann er að sjálfsögðu með honum í New York.

Allt byrjaði þetta þó í bakgörðunum í Miami þar sem Kimbo Slice stóð fyrir bardögum í fátækrahverfum borgarinnar. Masvidal varð þá frægur er hann hafði betur gegn hinum sterka dyraverði Reynaldo Fuentes eða Rey eins og hann var kallaður. Sá var óstöðvandi áður en hann lenti í Masvidal.

Hér má sjá fyrri bardaginn sem þótti svo vel heppnaður að það varð að fá þá aftur til þess að berjast.




Hér er svo síðari bardaginn á milli þeirra en milljónir manna hafa horft á þessa bardaga á Youtube.




„Á þessum tíma bjó ég í bílnum mínum og lét mig dreyma um ýmislegt. Meðal annars að ég ætti ísskáp sem væri fullur af mat,“ segir Masvidal en hann á Nate Diaz að þakka að þeir séu að fara að berjast.

Diaz hafði betur gegn Anthony Pettis í ágúst og eftir bardagann var fastlega búist við því að hann myndi skora Conor McGregor eða Khabib Nurmagomedov á hólm en svo var nú ekki.



„Ég var í svona löngu fríi því allir hjá UFC eru aumingjar. Það eru engir gangsterar lengur í þessu nema ég og Jorge,“ sagði Diaz og UFC-unnendur elskuðu hugmyndina. Þeir geta ekki beðið eftir laugardeginum.

Bardagi Diaz og Masvidal er í beinni útsendingu á Stöð 2 Sport á laugardag. Hitað er upp fyrir bardagann í Búrinu á fimmtudaginn.

MMA

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.