Bíó og sjónvarp

Hollywood logar vegna tölvugerðs James Dean

Birgir Olgeirsson skrifar
James Dean lést 24 ára að aldri árið 1955. Hann mun þó sjást í mynd sem er væntanleg á næsta ári með aðstoð tölvutækninnar.
James Dean lést 24 ára að aldri árið 1955. Hann mun þó sjást í mynd sem er væntanleg á næsta ári með aðstoð tölvutækninnar. Vísir/Getty

Framleiðendur myndarinnar Finding Jack hafa fengið leyfi aðstandenda til að notast við tölvugerða útgáfu af leikaranum James Dean sem lést 24 ára að aldri árið 1955.

Framleiðslufyrirtækið Magic City Films fékk leyfi aðstandenda leikarans en Hollywood-stjörnur hafa lýst yfir andúð sinni á uppátækinu.

„Þetta er hræðilegt. Skilningsleysið er skammarlegt,“ sagði leikarann Chris Evans á Twitter en hann er hvað þekktastur fyrir að leika Captain America í Avengers-myndunum.

„Ég er viss um að hann yrði himinlifandi með þetta,“ skrifaði leikarinn kaldhæðnislega um þessi tíðindi. „Kannski fáum við tölvu til að teikna nýtt Picasso-verk. Eða til að semja nokkur ný John Lennon-lög.“



Elijah Wood, sem lék Fróða í Hringadróttinsþríleiknum, skrifaði einfaldlega „Neibb, þetta ætti ekki vera inni í myndinni“ þegar hann tjáði sig um tíðindin á samfélagsmiðlum.



James Dean er hvað þekktastur fyrir leik sinn í myndunum Rebel Without a Cause og Giant.

Finding Jack er hasarmynd sem segir sögu bandarísks hermanns sem hjúkrar Labrador-hundi í Víetnam-stríðinu.

James Dean er hvað þekktastur fyrir myndirnar Rebel Without a Cause og Giant. Vísir/Getty

Verður James Dean „endurskapaður“ með hjálp gamals myndefnis og þá verður andlit hans teiknað inn á staðgengil með aðstoð tölvutækninnar.

Er um aukahlutverk að læra þar sem Dean „leikur“ hermann sem er bjargað af fyrrnefndum Labrador-hundi.

„Við leituðum lengi að hinum fullkomna leikara til að leika Rogan. Eftir mánaðaleit ákváðum við að nota James Dean,“ segir framleiðandi myndarinnar Anton Ernst.

Þetta er ekki fyrsta dæmið um að látnir leikarar séu „endurgerðir“ með hjálp tölvutækninnar.

Þannig var ásýnd Audrey Hepburn notuð í auglýsingu árið 2013. Andlit leikarans Peter Cushing var teiknað á leikara fyrir Stjörnustríðsmyndina Rogue One frá árinu 2016.

Í sömu mynd var notast við tölvutækni til að yngja leikkonan Carrie Fisher svo hún liti svipað út og hún gerði í Stjörnustríðsmyndinni A New Hope sem kom út árið 1977.

Þetta hefur einnig verið gert í tilfellum leikaranna Oliver Reed og Paul Walker sem létust áður en gerð myndar var lokið.

Þá er einnig algengt í dag að leikarar séu „yngdir“ með hjálp tölvutækninnar. Hefur þetta verið gert ansi oft í ofurhetjumyndunum frá Marvel en nýjasta dæmið er án ef Martin Scorsese-myndin The Irishman þar sem Robert De Niro, Al Pacino og Joe Pesci eru allir látnir leika sér mun yngri menn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.