Erlent

Trump segir Banda­ríkin stjórna olíunni í Mið-Austur­löndum

Hallgerður Kolbrún E. Jónsdóttir skrifar
Donald Trump, Bandaríkjaforseti, segir nokkrar evrópskar þjóðir tilbúnar til að taka við löndum sínum sem hafa gengið til liðs við ISIS en eru nú fangar.
Donald Trump, Bandaríkjaforseti, segir nokkrar evrópskar þjóðir tilbúnar til að taka við löndum sínum sem hafa gengið til liðs við ISIS en eru nú fangar. AP
Donald Trump, Bandaríkjaforseti, sagði á föstudag að ákvörðun hans um að draga bandarískar hersveitir frá landamærum Sýrlands og Tyrklands hafi hvorki hnekkt á trúverðugleika Bandaríkjanna, né svikið kúrdíska bandamenn og þar með aukið líkur á endurkomu hryðjuverkasamtaka sem kenna sig við íslamskt ríki á svæðinu. Þá hampaði hann vopnahléssamningnum á milli Tyrkja og Kúrda, sem virtist vera í hættu þegar vígahópar voru ósammála um hvað þyrfti að gera og hvort átök yrðu stöðvuð. Frá þessu er greint á vef fréttastofu AP.



„Það hafa orðið gríðarlegar framfarir, finnst mér, síðustu tvo daga,“ lýsti Trump yfir. Hann bætti við að „við höfum tekið stjórn á olíunni í Mið-Austurlöndum,“ en engar fregnir hafa staðfest þá staðhæfingu.

Hann hélt því fram tvisvar á föstudag að Bandaríkin hefðu „tekið stjórn á olíunni í Mið-Austurlöndum,“ en aðrir opinberir embættismenn Bandaríkjanna hafa ekki náð að útskýra hvað hann átti við með því.

Forsetinn sagði einnig að Recep Tayyip Erdogan, Tyrklandsforseti, sem og Sýrlenski lýðræðisherinn (SDF), hersveit Kúrda í norðurhluta Sýrlands, væru sammála um að vopnahléið væri skref í rétta átt og að þeir virtu vopnahléið. Þá sagði hann brask sitt í Sýrlandi „örlítið óhefðbundið.“

„Báðar hliðar bera góðan vilja fyrir brjósti og það eru miklar líkur á árangri,“ skrifaði hann á Twitter.

Jákvæðni forsetans virtist stangast á við það sem Erdogan hefur sagt en hann sagði í samtali við fréttamenn í Istanbúl að tyrkneskar hersveitir myndu hefja árás sína að nýju eftir fjóra daga ef kúrdískar hersveitir hörfuðu ekki af svokölluðu öryggissvæði, sem er 440 km langt og nær 30 km. inn í Sýrland.

Erdogan Tyrklandsforseti segir tyrkneskar hersveitir gera árás að nýju eftir fjóra daga hörfi kúrdískar hersveitir ekki af svokölluðu öryggissvæði.AP
Ekkert bendir til þess að kúrdískar hersveitir muni hörfa en þær hafa sakað hersveitir Tyrkja um að hafa svikið vopnahléið þegar þær héldu áfram árásum á landamærabæ.

Hluti hersveita Kúrda hafa heitið því að þeir muni ekki hörfa og segja vopnahléið svik af hálfu Bandaríkjanna, en hermenn þeirra hafa barist hlið við hlið í baráttunni gegn ISIS.



Eric Edelman, fyrrverandi sendiherra Bandaríkjanna í Tyrklandi, sagði að hann efaðist að Tyrkland, ásamt sýrlenskum bandamönnum sínum, gæti vaktað landamærin sem ná frá Efrat fljóti í vestri til landamæranna að Írak, án hjálpar Rússlands eða annarra.

„Það er gríðarleg landsvæði til að vakta og stór hluti þess er óbyggt,“ sagði Edelman. „Það þýðir líklegast að þeir hafa þegar komist að samkomulagi við Rússana eða Írani.“

Þrátt fyrir þetta ítrekaði Trump að friður ríkti.

„Það er vopnahlé eða pása eða hvað þú vilt kalla það,“ sagði hann. „Það voru einhverjar skothríðir í morgun,“ auk þess sem sprengjum var varpað en það var fljótt stöðvað og svæðið er nú aftur í „pásu,“ sagði forsetinn.

Þá sagði forsetinn að einhverjar evrópskar þjóðir hafi samþykkt að taka ábyrgð á löndum sínum sem hefðu gengið til liðs við ISIS en væru nú fangar.

„Allavega, miklar framfarir í gangi,“ skrifaði Trump á Twitter.

Trump sagði ekkert meira um Evrópuþjóðirnar sem hann segir nú að hafi samþykkt að taka við hluta vígamanna ISIS en hann hefur ítrekað kallað eftir því. Engin yfirvöld Evrópuþjóða hafa tilkynnt að þau hyggist taka við föngum úr röðum ISIS vígamanna.

Þetta staðfesti þó Mike Pompeo, utanríkisráðherra Bandaríkjanna, eftir að hann ræddi við fulltrúa NATO um mál Sýrlands í dag. „Við höfum fengið svör frá nokkrum löndum í dag um að þau séu tilbúin til að taka við þessum vígamönnum.“ Hann greindi þó ekki frá því hvaða lönd þetta væru.


Tengdar fréttir

Trump gaf samkomulagi Kúrda við Assad-liða blessun sína

Donald Trump, forseti Bandaríkjanna, mótmælti því ekki að sýrlenskir Kúrdar leituðu á náðir Bashar al-Assad, forseta Sýrlands, og bandamanna Rússa. Það gerðu Kúrdar eftir að Trump skipaði bandarískum hermönnum að yfirgefa Sýrland í aðdraganda innrásar Tyrkja, sem líta á sýrlenska Kúrda sem hryðjuverkamenn.

Erdogan samþykkir að leggja niður vopnin tímabundið

Forseti Tyrklands féllst á bón varaforseta og utanríkisráðherra Bandaríkjanna um að gera hlé á innrás sinni í norðausturhluta Sýrlands í kvöld. Vopnahlé verður í 120 klukkustundir og er ætlast til þess að hersveitir Kúrda yfirgefi það svæði við landamæri ríkjanna sem Tyrkir hafa útnefnt öruggt.

Óvissa um vopnahléið sem Tyrkir kalla pásu

Bardagar geisuðu áfram í Sýrlandi í dag, samkvæmt sýrlenskum Kúrdum og eftirlitsaðilum, þrátt fyrir að Tyrkir og Bandaríkjamenn hafi lýst yfir umdeildu vopnahléi í gær.

Sýr­lands­her hélt inn í Kobane

Taka bæjarins gerir Tyrkjum erfiðara um vik við að koma upp sínu svokallaða öryggissvæði við landamærin að Tyrklandi eins og stefnt hefur verið að.




Fleiri fréttir

Sjá meira


×